Kuwa mbere tariki ya 14 Werurwe 2022, mu Mirenge yose hatangijwe Urugerero rw’Inkomezabigwi icyiciro cya cyenda, ku rubyiruko rwarangije amashuri yisumbuye mu mwaka w’amashuri wa 2020-2021, rufite insanganyamatsiko igira iti: "Duhamye umuco w'ubutore ku rugerero rwo kwigira".

Ku rwego rw'Akarere; rwatangirijwe mu Murenge wa Mushishiro, aho urubyiruko rwifatanyije n'Umuyobozi w'Akarere Madamu KAYITARE Jacqueline n'inzego z'umutekano mu muganda wo kubakira inzu umuturage utishoboye.

 Umuyobozi w’Akarere atangiza Urugerero rw’Inkomezabigwi icyiciro cya cyenda mu Murenge wa Mushishiro

Uru rugerero rw’Inkomezabigwi icyiciro cya cyenda ruzarangwa n’ibikorwa bitandukanye birimo kubakira abatishoboye, kubaka uturima tw’igikoni, gusibura imihanda yangijwe n’imvura, ibindi bikorwa bigamije kuzamura imibereho myiza y'abaturage ndetse n'ibifitiye Igihugu akamaro muri rusange.

Umuyobozi w'Akarere ka Muhanga atangiza urugerero rw’Intore z’Inkomezabigwi icyiciro cya cyenda ku rwego rw’Akarere, yakanguriye Inkomezabigwi kwitabira neza uru rugerero, bagatanga uruhare rwabo mu gukemura ibibazo bibangamiye imibereho myiza y’abaturage n’ibyugarije urubyiruko by’umwihariko. Yasoje abasaba kurushaho kurangwa n’indangagaciro n’umuco w’ubutore, bakirinda ingeso mbi zishobora kuganisha ubuzima bwabo mu kangaratete n’Igihugu muri rusange kuko urubyiruko ari rwo mbaraga z’Igihugu ubu n’igihe kizaza.

Mu bindi bikorwa bizibandwaho mu rugerero rw’Inkomezabigwi icyiciro cya cyenda, harimo gufasha muri gahunda zo kwitegura kwibuka ku nshuro ya 28 Jenoside yakorewe Abatutsi, gukangurira abaturage kwirinda Covid-19 no kuyikingiza byuzuye, guca ubuzererezi, kubungabunga ibidukikije no gutoza ubuhanzi butoza ishyaka ry’u Rwanda.

Intore z’Inkomezabigwi zitabiriye urugerero mu Murenge wa Muhanga

Yanditswe na:

UWINGABIRE Dieudonné (Ag.PRO)