DIYOSEZE GATOLIKA YA KABGAYI YIZIHIJE UMUNSI MPUZAMAHANGA W’UMURIMO

Ku itariki ya 01.05.2026, Umuyobozi w'Akarere Madamu ari kumwe n'abahagarariye inzego z'umutekano, bifatanyije n'ubuyobozi n'abakozi ba Diyoseze Gatolika ya Kabgayi n’Ibigo biyishamikiyeho mu birori byo kwizihiza Umunsi Mpuzamahanga w'Umurimo ufite insanganyamatsiko igira iti: "Gufatanya mu guteza imbere umurimo, kongera ihangwa ry'umurimo, no guteza imbere ubudahangarwa bw'ubukungu bw'imbere mu Gihugu."

Mu butumwa bwe, Umuyobozi  w’Akarere yavuze ko kwizihiza umunsi w’umurimo biduha umwanya wo kuzirikana no guha agaciro uruhare rukomeye rw’abakozi n’abakoresha mu guteza imbere ubukungu n’imibereho myiza y’abakozi n’Abanyarwanda bose muri rusange. Yibukije ko gukora umurimo unoze bisaba kuwumenya, kuwukunda, kuwitaho, gukorera ku ntego no kuzirikana ko umurimo unoze uhesha agaciro nyirawo ukagahesha n’urwego akorera.

Umuyobozi w’Akarere kandi yashimiye Diyoseze ya Kabgayi ku ruhare rukomeye igira mu guhanga no guteza imbere umurimo mu Karere ka Muhanga. Yagarutse kandi ku bibazo Isi ihanganye na byo ndetse bibangamiye umurimo birimo ihungabana ry’ubukungu, izamuka ry’ibiciro by’ibikomoka kuri Peteroli, izamuka ry’ibiciro ku isoko n’ibindi. Yavuze ko ibibazo nk’ibi bigira ingaruka ku mibereho y’abaturage no ku mahirwe y’akazi, akaba yarasabye abakozi gushyira imbaraga mu guteza imbere ubukungu bw’imbere mu Gihugu, kongerera agaciro ibyo dukora, guteza imbere umuco wo kuzigama, kuzamura umuco wo gukunda no gukoresha iby’iwacu, guteza imbere inzego zifite ubushobozi bwo gutanga akazi kenshi nko mu buhinzi n’ubworozi n’ahandi.

Kugira ngo kandi ibi bigerweho, Umuyobozi w’Akarere yavuze ko bisaba buri wese kunoza neza umurimo, kurangwa n’imyitwarire mbonezamurimo no gukora kinyamwuga.

Umuyobozi w’Akarere yasoje ubutumwa bwe, ashima uruhare rwa Diyoseze ya Kabgayi mu iterambere ry’ubukungu n’imibereho myiza y’abaturage binyuze mu guteza imbere uburezi, ubuvuzi, gufasha abatishoboye no kurera urubyiruko mu ndangagaciro Nyarwanda n’iz’ukwemera.