MUHANGA: ABAYOBOZI B’AMASHURI N’ABAREZI BASABWE KURINDA IBYAGEZWEHO NO KUZAMURA IREME RY’UBUREZI

Ku wa 31 Kanama 2026, Umuyobozi w’Akarere ka Muhanga, Madamu Kayitare Jacqueline, yayoboye inama y’uburezi yaguye ku rwego rw’Akarere, yiga ku musaruro w’umwaka w’amashuri wa 2025/2026, imyiteguro y’umwaka wa 2026/2027 ndetse n’ingamba zo kurushaho kuzamura ireme ry’uburezi.

Iyi nama yitabiriwe n’Abagize Inama y’Umutekano itaguye y’Akarere, Abanyamabanga Nshingwabikorwa b’Imirenge, abakozi bashinzwe uburezi ku rwego rw’Imirenge n’Akarere, abayobozi b’ibigo by’amashuri, ababyeyi bahagarariye abandi muri buri Murenge ndetse n’abafatanyabikorwa b’Akarere mu burezi.

Mu ngingo zaganiriweho harimo ishusho y’uburezi mu Karere, imitsindire y’ibizamini bya Leta bisoza umwaka w’amashuri wa 2025/2026, imyiteguro y’itangira ry’umwaka w’amashuri wa 2026/2027, impinduka n’amavugurura ari gukorwa mu burezi ndetse n’imyitwarire mbonezamurimo mu barezi n’abarimu.

Mu isuzuma ryakozwe, Akarere ka Muhanga kagaragaje ko umusaruro w’ibizamini bya Leta bisoza umwaka w’amashuri wa 2025/2026 wazamutseho 25% ugereranyije n’umwaka wa 2024/2025.

Ubuyobozi bw’Akarere buvuga ko iri zamuka ryaturutse ku gukurikirana imyigire y’abanyeshuri, kongera uruhare rw’abayobozi b’ibigo by’amashuri n’abarezi ndetse no gushimangira ubufatanye hagati y’amashuri, ababyeyi n’inzego z’ibanze.

Umuyobozi w’Akarere, Kayitare Jacqueline, yavuze ko umusaruro utari ushimishije wabonetse mu mwaka wabanje watumye inzego zirebwa n’uburezi zisubira ku bibazo byari bibangamiye imyigire, maze zishyiraho ingamba zo kubikemura.

Yagize ati: “Twarabanje twitandukanya n’imyitwarire ishobora kubangamira umusaruro w’amasomo duha abana, tureba aho ibintu byapfiriye dufata ingamba.”

Mu ngamba zafashije harimo gahunda yiswe “Isaha y’Uburezi”, ihuza buri cyumweru abayobozi b’Akarere, abashinzwe uburezi mu Mirenge n’abayobozi b’ibigo by’amashuri, bakarebera hamwe uko uburezi buhagaze, ibyagezweho n’ibikwiye gukosorwa.

Kayitare yavuze ko iyi gahunda izakomeza kuko ifasha kumenya hakiri kare ibibazo bishobora kubangamira imyigire no kubishakira ibisubizo bitaragira ingaruka ku musaruro w’abanyeshuri.

Abarezi basabwe gukomeza gukurikirana abanyeshuri

Mu butumwa bwe, Umuyobozi w’Akarere yasabye abayobozi b’ibigo by’amashuri n’abarezi gukomeza ingamba zatumye umusaruro wiyongera, by’umwihariko gukurikirana abanyeshuri hakiri kare no gufasha abafite intege nke mu myigire.

Yabasabye kandi gukumira ibibazo bishobora gutuma abana bava mu ishuri, kongera imbaraga muri gahunda yo gufatira ifunguro ku ishuri, kurangwa n’imyitwarire iboneye no kwita ku mutekano w’ibikorwaremezo by’amashuri.

Abayobozi b’amashuri basabwe kandi kwitegura neza itangira ry’umwaka w’amashuri wa 2026/2027 ndetse no kuzitabira amatora y’Inzego z’Imitegekere y’Igihugu zegerejwe abaturage.

Placide Ntigurirwa, uyobora Groupe Scolaire Ste Etienne mu Murenge wa Shyogwe, yavuze ko ishuri ayobora ryiteguye gukomeza gutera imbere.

Agira ati: “Mu burezi nta kudohoka. Uburezi ni uguhozaho kandi bugakorwa ahantu hose, n’igihe cyose tugaharanira gutera intambwe ijya imbere.”

Yavuze ko mu mwaka mushya w’amashuri bazakomeza kwegera abanyeshuri, gukangurira abarimu gutegura amasomo neza no kwita ku bana bafite intege nke.

Mu nama hanagarutswe kuri gahunda yo kongerera abarimu ubushobozi mu rurimi rw’Icyongereza.

Akarere kagaragaje ko kugeza ubu 91% by’abarimu bamaze kwitabira aya mahugurwa, mu gihe intego ari ukugera kuri 100%.

Abayobozi b’ibigo by’amashuri basabwe gukomeza gukurikirana uko abarimu bitabira aya masomo no kubakangurira kuyitabira no gukomeza kwiga.

Ku bijyanye n’imyitwarire mbonezamurimo, Umuyobozi w’Akarere yashimangiye ko umurezi akwiye kurangwa n’imyitwarire iboneye no kubahiriza inshingano ze, avuga ko uzagaragara ko atitabira amasomo kandi akaba atageze ku rwego rwifuzwa azahanwa hakurikijwe amategeko.

Uruhare rw’ababyeyi n’abandi bafatanyabikorwa na rwo rwagarutsweho nk’inkingi y’ingenzi mu kuzamura ireme ry’uburezi.

Padiri Jean Baptiste Twambajimana, uhagarariye ibigo by’amashuri muri Diyosezi ya Kabgayi, yavuze ko ireme ry’uburezi ridashobora kugerwaho n’ishuri ryonyine, ahubwo ko risaba ubufatanye bw’inzego zose.

Yagaragaje ko Leta, ababyeyi, abayobozi b’amashuri n’abafatanyabikorwa bakwiye gukomeza gukorera hamwe mu kwita ku burezi, uburere n’imibereho myiza y’umunyeshuri.

Ku ruhande rw’Akarere, uruhare rw’ababyeyi muri gahunda yo gufatira ifunguro ku ishuri na rwo rugaragazwa nk’imwe mu ngamba zagize uruhare mu kuzamura imibereho y’abanyeshuri. Isuzuma rya Minisiteri y’Uburezi ryagaragaje umusaruro uri hejuru ya 93% muri iyi gahunda.

Akarere kandi gakomeje gahunda zirimo “fresheri ku Ishuri”, igamije guteza imbere isuku, na “Smart Water Tank”, igamije kugeza amazi meza ku bigo by’amashuri. Kugeza ubu, 66% by’ibigo by’amashuri bimaze kugira ubu buryo bwo kubona amazi.

Muri iyi nama kandi hatanzwe ibihembo by’ishimwe ku bigo by’amashuri abanza n’Icyiciro rusange byahize ibindi mu bizamini bya Leta bisoza umwaka w’amashuri wa 2025/2026.

Hanashimiwe kandi Umurenge wa Nyarusange, wagaragaje umusaruro mwiza kurusha indi Mirenge mu mitsindire y’ibizamini bya Leta.

Ibihembo byatanzwe mu rwego rwo gushimira ibigo by’amashuri n’abarezi bagize uruhare mu kuzamura umusaruro w’abanyeshuri no kubashishikariza gukomeza gukora neza.

Inama y’uburezi yaguye ku rwego rw’Akarere iba buri mezi atandatu, cyane cyane mbere gato 

Ubuyobozi bw’Akarere ka Muhanga buvuga ko gukomeza gukurikirana imyigire y’abanyeshuri, gufasha buri mwana hakurikijwe ubushobozi bwe, kongerera abarimu ubumenyi, guteza imbere imyitwarire iboneye mu barezi no gukomeza ubufatanye hagati y’inzego zose ari byo bizafasha kurinda ibyagezweho no kurushaho kuzamura ireme ry’uburezi muri Muhanga.