MUHANGA: Ishuri Rikuru Gatolika rya Kabgayi ryafunguye inyubako nshya izafasha kongera ireme ry'uburezi mu Ishami ry'Ubuvuzi

Mu rwego rwo gukomeza guteza imbere uburezi bufite ireme no kongerera ubushobozi urwego rw'ubuzima mu Rwanda, Ishuri Rikuru Gatolika rya Kabgayi (ICK) ryafunguye ku mugaragaro inyubako nshya yitiriwe Sainte Elisabeth, izakorerwamo n'Ishami ry'Ubuvuzi (Faculty of Health Sciences).

Uyu muhango wabereye i Kabgayi mu Karere ka Muhanga witabiriwe n'abayobozi batandukanye, barimo Umuyobozi w'Akarere ka Muhanga, Madamu Jacqueline Kayitare, ubuyobozi bwa Diyosezi ya Kabgayi n'ubwa ICK, abahagarariye Minisiteri y'Ubuzima, HEC, n'abafatanyabikorwa batandukanye. 

Iyi nyubako nshya yuzuye itwaye amafaranga arenga miliyari imwe y'amafaranga y'u Rwanda, ikaba igizwe n'ibyumba by'amashuri bifite ubushobozi bwo kwakira abanyeshuri bagera kuri 850, ibyumba by'ikoranabuhanga bigezweho ndetse n'ibiro by'abayobozi n'abarimu. Izafasha Ishuri Rikuru Gatolika rya Kabgayi kurushaho kongera ubushobozi bwo gutanga uburezi bufite ireme ku banyeshuri biga mu Ishami ry'Ubuvuzi.

Uhagarariye Minisiteri y'Ubuzima yavuze ko uyu muhango utari uwo gutaha inyubako gusa, ahubwo ari uwo kwishimira intambwe igihugu gikomeje gutera mu guteza imbere urwego rw'ubuzima.

Yagize ati: "Uyu munsi ntabwo dutaha inyubako gusa, ahubwo turizihiza icyerekezo n'iterambere ry'Igihugu."

Yanashimiye ubuyobozi bwa ICK ku bufatanye bwabufashije kugera kuri iki gikorwa, anashishikariza abanyeshuri bazigira muri iyi nyubako gukoresha neza amahirwe bahawe kugira ngo bazabe abakozi b'ubuzima bafite ubunyamwuga, ubwitange n'indangagaciro zibereye umwuga bahisemo.

Mu ijambo rye, Umuyobozi w'Akarere ka Muhanga, Madamu Jacqueline Kayitare, yashimiye ubuyobozi bwa ICK ku bufatanye bukomeje kuranga ibikorwa bihuriweho n'Akarere, agaragaza ko iyi nyubako izagira uruhare rukomeye mu kongera umubare w'abakozi b'ubuzima igihugu gikomeje gukenera.

Yagize ati: "Turashimira ICK uruhare ikomeje kugira mu kongera umubare w'abaganga, abaforomo n'ababyaza bafite ubumenyi bufite ireme. Turasaba abarezi gukomeza gutanga ubumenyi bufite ireme, na bo banyeshuri bakabukoresha neza kuko igihugu kibategerejemo umusaruro ukomeye."

Nyiricyubahiro Musenyeri Balthazar Ntivuguruzwa, akaba n'Umuyobozi Mukuru w'Ikirenga wa ICK, yashimiye Imana n'abafatanyabikorwa bose bagize uruhare mu kubaka iyi nyubako, by'umwihariko Minisiteri y'Ubuzima, HEC, Akarere ka Muhanga na Chancen International, bagize uruhare mu guteza imbere ireme ry'uburezi no gufasha abanyeshuri kubona amahirwe yo kwiga.

Gufungura inyubako nshya ya Sainte Elisabeth ni indi ntambwe ikomeye mu rugendo rwo guteza imbere uburezi mu Ishami ry'Ubuvuzi mu Rwanda. Biteganyijwe ko izafasha ICK kwakira abanyeshuri benshi kurushaho no kubategura neza kugira ngo bazatange serivisi z'ubuzima zinoze kandi zifite ireme.

Ibi bishimangira kandi ko ubufatanye hagati ya Kiliziya Gatolika, inzego za Leta n'abafatanyabikorwa mu iterambere bukomeje gutanga umusaruro ugaragara mu kubaka igihugu gifite abakozi b'ubuzima bafite ubumenyi, ubunyamwuga n'ubwitange bwo gukorera abaturage.