Muri Nyakanga, Inama y'Umutekano Itaguye y'Akarere ka Muhanga yasuye Imirenge yose igize Akarere
Mu rwego rwo gukomeza kwegera abaturage no gukurikirana ishyirwa mu bikorwa rya gahunda zigamije iterambere ry'ubukungu n'imibereho myiza, abagize Inama y'Umutekano Itaguye y'Akarere ka Muhanga bakoze ingendo mu Mirenge yose igize Akarere mu kwezi kwa Nyakanga 2026. Izi ngendo zari zigamije gusuzuma uko gahunda za Leta zishyirwa mu bikorwa no gukomeza gushimangira ubufatanye hagati y'inzego z'ubuyobozi n'abaturage.
Mu gitondo, abagize Inama y'Umutekano Itaguye baganiraga n'ibyiciro binyuranye birimo abayobozi b'Imidugudu, Abanyamabanga Nshingwabikorwa b'Utugari n'Imirenge, inzego z'umutekano ndetse n'abandi bafatanyabikorwa. Bareberaga hamwe ishyirwamubikorwa rya gahunda z'iterambere, ibibazo bikibangamiye abaturage ndetse n'ingamba zo kurushaho kunoza serivisi zihabwa abaturage.
Nyuma ya saa sita, bakoraga inama rusange n'abaturage mu Tugari dutandukanye. Muri izo nama, abaturage bashishikarizwaga kubahiriza amabwiriza agenga itunganywa ry'ibiribwa n'ibinyobwa gakondo bikozwe mu binyampeke, ibitoki n'imbuto bikorewe mu miryango, kwirinda ibinyobwa n'ibiribwa bitujuje ubuziranenge no gukomeza kwita ku mutekano aho batuye.
Banaganirijwe ku kamaro ko kwirinda amakimbirane yo mu muryango, gukora cyane bakiteza imbere no gutanga umusanzu w'ubwisungane mu kwivuza wa 2026-2027 kugira ngo buri muturage abashe kubona serivisi z'ubuvuzi igihe azikeneye. Mu rwego rwo kurinda ubuzima bw'abaturage, hibanzwe kandi ku bukangurambaga bwo gukumira no kwirinda icyorezo cya Ebola ndetse n'indwara y'ubuganga (Rift Valley Fever - RVF).
Muri izi nama, abaturage bahawe umwanya wo gutanga ibibazo n'ibitekerezo byabo. Abagize Inama y'Umutekano Itaguye bakiriye ibyo bibazo, bimwe bihita bikemurirwa aho, ibindi bihabwa umurongo w'uburyo bizakemurwa n'inzego zibishinzwe. Abaturage bashimye ubu buryo bwo kubegera no kubatega amatwi, bavuga ko bubafasha kurushaho kugira uruhare mu bibakorerwa no gukomeza ubufatanye n'ubuyobozi mu rugendo rw'iterambere ry'Akarere ka Muhanga