Ku itariki ya 18 Nyakanga 2025, Perezida w’Inama Njyanama y’Akarere  Bwana NSHIMIYIMANA  Gilbert ari kumwe na Komite Nyobozi y’Akarere n’inzego z’umutekano, bakiriye Itsinda ry'Abadepite bagize Komisiyo y'Ubumwe bw'Abanyarwanda, Uburenganzira bwa Muntu no kurwanya Jenoside rigizwe na Hon. Depite NDANGIZA Madina na Hon. Depite SENANI Benoît, basuye Akarere ka Muhanga hagamijwe gusesengura ishyirwamubikorwa rya Politiki y'Igihugu y'Ubumwe n'ubwiyunge, inzitizi zihari, ibyifuzo n’inama mu kurushaho gusigasira Ubumwe n'Ubudaheranwa bw'Abanyarwanda.

Depite Ndangiza Madina yavuze ko ikigamijwe n’abadepite bagize iyi Komisiyo ari ukumenya uruhare inzego z'ibanze n' abandi bafatanyabikorwa bagira mu ishyirwa mu bikorwa rya Politiki y'lgihugu y'Ubumwe n'Ubwiyunge y'umwaka wa 2020, imikorere ya gahunda z'isanamitima no gukira ibikomere byatewe n'ingaruka za Jenoside yakorewe Abatutsi mu 1994, imibereho y'imiryango y'abarokotse Jenoside yakorewe Abatutsi mu 1994 batishoboye n’ uruhare rw'ibikorwa bihuriweho n'ibyiciro bitandukanye by' Abanyarwanda mu gushimangira ubumwe n'ubudaheranwa bw’Abanyarwanda.

Mu nama bagiranye n’Ubuyobozi bw’Akarere, abahagarariye Sosiyete Sivile ndetse n’abahagarariye imiryango ishingiye ku myemerere, Umuyobozi w’Akarere Madamu KAYITARE Jacqueline yagaragarije aba badepite uko Akarere gashyira mu igenamigambi gahunda z’Ubumwe n’Ubudaheranwa bw'Abanyarwanda, ibikorwa by’Akarere n’Abafatanyabikorwa mu bumwe n’Ubudaheranwa n’imibereho y’Abarokotse Jenoside yakorewe Abatutsi batishoboye.

Nyuma y’inama, Abadepite basuye ndetse baganira n’abarokotse Jenoside yakorewe Abatutsi batujwe mu Mudugudu wa Songa mu Kagari ka Mbare mu Murenge wa Shyogwe; amatsinda y'Ubumwe n'Ubudaheranwa (TWIYUBAKE A&B) akorera mu Kagari ka Mbare mu Murenge wa Shyogwe, itsinda ry’Ubumwe n’ubudaheranwa Umucyo rikorera mu mu Murenge wa Muhanga rihuje Abarokotse Jenoside yakorewe Abatutsi, abagize uruhare muri Jenoside yakorewe Abatutsi n'urubyiruko ndetse basura  n’Umuryango warokotse Jenoside yakorewe Abatutsi, utuye mu Kagari ka Gahogo mu Murenge wa Nyamabuye.