Kuwa Gatatu taliki 28 Gicurasi, Umuyobozi w’Akarere Madamu KAYITARE Jacqueline ari kumwe n'abahagarariye inzego zitandukanye mu Karere, bakiriye itsinda ry'Abadepite rigizwe na Hon. Depite NABAHIRE Anastase, Hon. Depite MUJAWABEGA Yvonne na Hon.Depite SIBOBUGINGO Gloriose, baje mu ruzinduko rw'iminsi irindwi mu Karere hagamijwe gusura abaturage no gukurikirana imikorere n’imitegekere y’inzego z’Igihugu zegerejwe abaturage n’izindi nzego mu gutanga serivisi ku baturage.

Mu kiganiro cyabereye ku cyicaro cy’Akarere, abadepite bagaragarijwe ishusho y’ibibazo byagiye byakirwa n’Akarere mu bihe bitandukanye n’uko byagiye bikemurwa, hanagaragazwa zimwe mu ngamba zafashwe mu kubaka ubushobozi bw’abaturage no guteza imbere imiyoborere myiza. 

Mu minsi irindwi bamaze mu Karere, abadepite basuye imirenge itandukanye baganira n’abayobozi b’ibyiciro bitandukanye ndetse baganira n’abaturage ku mitangire ya serivisi z’ikoranabuhanga zirimo irembo, serivisi z’ubutaka, gahunda y’ubumwe n’ubudaheranwa bw’Abanyarwanda, banabakangurira kwirinda no gukumira amakimbirane. 

Mu biganiro byakozwe mu mirenge, abaturage bagize umwanya wo gutanga ibitekerezo byabo ku bibazo bahura na byo, banasangiza abadepite ku ntambwe bamaze gutera mu bumwe n’ubwiyunge nyuma ya jenoside yakorewe Abatutsi mu 1994.