Ku itariki ya 29 Ugushyingo, mu Mirenge yose, habaye umuganda rusange usoza ukwezi k'Ugushyingo. Hon. Depite MUKANDANGA Speciose na Hon. Depite MUKAMANA Alphonsine bari kumwe n'Umunyamabanga Nshingwabikorwa w’Intara y’Amajyepfo , Komite Nyobozi y'Akarere, abafatanyabikorwa b'Akarere n'inzego z'umutekano bifatanyije n'abaturage bo mu Murenge wa #Nyamabuye mu muganda wo gukora isuku mu Mujyi wa Muhanga no gutangiza ubukangurambaga bw'isuku.

Mu butumwa abayobozi bagejeje ku baturage bitabiriye umuganda babakanguriye kurangwa  n'indangagaciro y'isuku bita ku  isuku y'aho batuye naho bakorera, gushyigikira abantu bafite ubumuga no kuzitabira umunsi mpuzamahanga wahariwe abantu bafite ubumuga uzaba ku itariki ya 03 Ukuboza 2025.

By'umwihariko Hon. Depite MUKANDANGA Speciose yashimye iterambere ryagezweho mu Karere ka Muhanga, asaba abaturage gukomeza gutura neza no gukoresha ubutaka icyo bwagenewe, kwita ku burere bw'abana no kubarinda ihohoterwa, kwirinda amakimbirane yo mu miryango, kurwanya inda zitateguwe ziterwa abantu, kubungabunga ibyagezweho no gusigasira ubumwe n'ubudaheranwa bw'Abanyarwanda kuko ari yo nkingi ikomeye Igihugu cyubakiyeho.

Abaturage kandi bagejejweho amabwiriza ya Minisiteri y’Ubuzima agendanye n'isuku ndetse n'ubutumwa bw'Ikigo cy'imisoro n'amahoro bubakangurira kwishyura umusoro ku mutungo utimukanwa,umusoro ku nyungu z'ubukode n'umusoro ku binyabiziga ugenewe gusana imihanda.