Ku itariki ya 07 Gicurasi, Umuyobozi w'Akarere KAYITARE Jacqueline yakiriye Hon. Depite KALISA Jean Sauveur na Hon. Depite MUJAWABEGA Yvonne bo muri Komisiyo y'Imibereho y'Abaturage mu nteko Ishinga Amategeko  baje mu ruzinduko rw'iminsi ibiri hagamijwe kureba ingamba zashyizweho muri gahunda yo gukemura ibibazo by'imirire mibi n'igwingira mu bana.

Mu nama bagiranye n’abayobozi mu byiciro bitandukanye harimo abagize Komite Nyobozi y’Akarere; Umujyanama uhagarariye komisiyo y’imibereho myiza mu nama njyanama y’Akarere; inzego z’umutekano, Umuyobozi w’ibitaro by’Akarere, Umuyobozi w’ishami ry’imibereho myiza n’ubuzima mu Karere; Abanyamabanga Nshingwabikorwa b’Imirenge, uhagarariye ihuriro ry’abafatanyabikorwa mu Karere, uhagarariye Inama y’Igihugu y’Abagore, uhagarariye Inama y’Igihugu y’Urubyiruko, Abayobozi b’Ibigo Nderabuzima bikorera mu Karere, uhagarariye Abajyanama b’Ubuzima mu Karere n’abandi, bagaragaje ko uruzinduko rwabo rugamije kumenya ishusho y’uko imirire mibi n’igwingira bihagaze mu Karere, uko gahunda zitandukanye zo kurwanya imirire mibi n’igwingira zishyirwa mu bikorwa, uruhare rw’abafatanyabikorwa, imbogamizi n’ingamba zihari, uruhare rw’Abajyanama b’ubuzima mu kurwanya imirire mibi n’igwingira mu bana.

Nyuma y'inama no kugaragarizwa  uko Akarere gahagaze mu kurwanya imirire mibi, igwingira ry'abana bato n'ingamba kafashe kugira ngo iki kibazo gikemuke burundu Abadepite basuye Imirenge ya Rugendabali na Kabacuzi. Muri iyi mirenge basuye ingo mbonezamikurire y’abana bato, Ibigo nderabuzima n’imwe mu miryango yo muri iyi mirenge. Mu biganiro byabo bibanze  ku kureba uruhare rw'abajyanama b'ubuzima, Ibigo nderabuzima n'ingo mbonezamikurire y'abana bato mu kurwanya imirire mibi n'igwingira mu bana. Baganiriye kandi n’abaturage bababwira uko bategura indyo yuzuye ndetse bareba isuku aho abaturage batuye n’imirima y’imboga.

Mu gusoza uru ruzinduko, Hon. Depite KALISA Jean Sauveur yashimye ibikorwa birimo gukorwa n’Akarere n’abafatanyabikorwa mu rwego rwo gukumira no kurwanya imirire mibi n'igwingira.