Ku itariki ya 08 Ugushyingo, Guverineri  w’Intara y’Amajyepfo Madamu KAYITESI Alice ari kumwe n'abagize inama y'umutekano itaguye y'Intara, yayoboye inama nyunguranabitekerezo yahuje abagize inama y’umutekano itaguye y’Akarere n'abandi bayobozi b'ibyiciro bitandutakanye kuva ku rwego rw'Umudugudu kugera ku rwego rw'Umurenge. Inama kandi yitabiriwe n’abajyanama b'ubuzima, abunzi, inshuti z'iumuryango, urugaga rw'abikorera, abahagarariye imiryango ishingiye ku myemerere, abafatanyabikorwa b’Akarere n'abandi. Iyi nama yahuje abayobozi bo mu mirenge ya Rongi, Kibangu na Nyabinoni.

Inama nk'iyi kandi yabereye mu Murenge wa Kiyumba ikaba yari iyobowe n'Umunyamabanga Nshingwabikorwa w'Intara y'Amajyepfo Bwana Nshimiyimana Vedaste ari kumwe n'Umuyobozi wa Police muri iyi Ntara. Iyi nama yitabiriwe n'abayobozi baturutse mu Mirenge ya Kiyumba, Kabacuzi na Rugendabali. Muri rusange muri ibi biganiro hagarutswe ku gukomeza kwicungira umutekano no gukumira ibyaha, kugira uruhare muri gahunda z’iterambere n’imibereho myiza y’abaturage. Ibiganiro kandi  byibanze ku kwihaza mu biribwa, abayobozi basabwa gukangurira abaturage  guhnga imirima yose idahinze mu rwego rwo kongera umusaruro ukomoka ku buhinzi. By’umwihariko Guverineri w’Intara y’Amajyepfo yashimiye aba bayobozi uruhare bagize mu matora y’Umukuru w’Igihugu, ay’Abadepite n’ay’Abasenateri yabaye mu kwezi kwa Nyakanga na Nzeri mu mwaka wa 2024. Yibukije abayobozi mu byiciro bitandukanye  kwita ku bikorwaremezo birimo  imihanda n'amateme by'aho batuye kugira ngo Imidugudu ikomeze kuba nyabagendwa. Yabasabye kandi kwihuta mu iterambere ryabo bakanafasha abaturage bashinzwe mu rugendo rw'iterambere. Yibukije abitabiriye ibiganiro ko Leta yashyizeho amahirwe menshi yo guteza imbere abaturage.  Guverineri w’Intara y’Amajyepfo Madame Alice KAYITESI yasabye aba bayobozi kurangwa n'indangagaciro, baha serivisi nziza abaturage birinda ikimenyane na ruswa.