Ku itariki ya 23 Ukwakira 2025, Abagize Komite Nyobozi y'Akarere bakiriye Hon. Senateri NYIRASAFALI Espérance wo muri Komisiyo ya Sena y'Ububanyi n'Amahanga, Ubutwererane n'Umutekano waje mu gikorwa cyo kugenzura uko ingamba zafashwe zo gukumira no kurwanya impanuka zo mu muhanda zishyirwa mu bikorwa. Ibiganiro yagiranye n’ubuyobozi bw’Akarere byitabiriwe n’abahagarariye Sosiyete/Amakoperative y'abatwara abagenzi mu modoka, Amakoperative y’abatwara abagenzi ku magare no kuri moto, Abafite amashuri yigisha amategeko y'umuhanda no gutwara imodoka, inzego z'umutekano n’Abafite amagaraje (garages).

Ibiganiro bagiranye byibanze ku kureba uko abakoresha ibinyabiziga, amagare n’abagendesha amaguru bafashwa kugendera mu muhanda, ibikorwa byakozwe  bigamije gukosora ahateza impanuka, ibikorwa mu gufasha amashuri yigisha amategeko y’umuhanda gutwara ibinyabiziga no kunoza imikorere y’amagaraje, ibitera impanuka muri rusange n’ingamba zafashwe mu gukumira impanuka.

Muri zimwe mu ngamba zafashwe, Ubuyobozi bw’Akarere bwagaragaje ko ku bufatanye na Polisi, hakozwe ubukangurambaga mu bihe bitandukanye ku bakoresha umuhanda kugira ngo basobanukirwe uko bakwiriye kwitwara mu muhanda, hashyizweho ibihano bihabwa abakora amakosa mu muhanda harimo n’imodoka zishaje zishobora guteza impanuka ndetse n’izidafite ubwishingizi, hashyizweho ibirango bifasha abakoresha umuhanda kwitwararika no kubahiriza amategeko y’umuhanda. Hagaragajwe kandi ko hakorwa ubugenzuzi ku mikorere y’amashuri kugira ngo atange ubumenyi ndetse n’imiterere y’ibinyabiziga.

Nyuma y’ibiganiro, Senateri NYIRASAFALI ari kumwe n'Ubuyobozi bw'Akarere basuye igaraje rya Kabgayi hagamijwe kureba niba igaraje rifite icyangombwa gitangwa na RICA, abakozi bahagije kandi bafite ubumenyi buhagije ku byo bakora, bbakozi bafite ubwishingizi bwose buteganywa, isuku, uburyo bwo kwirinda impanuka, inyubako zihagije, ahagenewe guhurizwa abantu mu gihe habaye inkongi n’bindi.