Ku itariki ya 25 Mata, mu cyumba cy’inama cya Hotel Saint Andre Kabgayi habereye igikorwa cyo gusoza amahugurwa (induction course) y'iminsi 2 yagenewe abakozi bashya 70 bo mu Turere twa Muhanga, Kamonyi, Ruhango na Nyaruguru yateguwe ku bufatanye bw’utu Turere n’Ishyirahamwe rihuza Inzego z’ibanze n’Umujyi wa Kigali (RALGA). 

Ni igikorwa cyitabiriwe n’abayobozi mu nzego zitandukanye barimo; Umuyobozi w’Ingabo n’Umuyobozi wa Police mu Ntara y’Amajyepfo, abayobozi b’Uturere twa Nyaruguru na Ruhango, Umuyobozi w’Akarere wungirije ushinzwe Iterambere ry’ubukungu mu Karere ka Muhanga, Abanyamabanga Nshingwabikorwa b’Uturere twa Muhanga na Kamonyi n’abandi.

Ubutumwa abayobozi batandukanye bagejeje ku bakozi bashya basoje amahugurwa bwibanze ku kubasaba kwegera abaturage no kubacyemurira ibibazo, gufata ibyemezo bikwiye mu gihe gikwiye, gukorera mu mucyo, kugisha inama no kubahiriza amategeko, gutanga serivisi kuri bose birinda amarangamutima, gukurikirana isuku n’umutekano w’abaturage,gukora ibikorwa biteza imbere abaturage no kurangwa n’indangagaciro z’umuco Nyarwanda.