Kuri uyu wa gatatu tariki ya 15 Ukuboza 2021, mu Kigo cy’Igihugu cy’amahugurwa mu by’imicungire y’Abakozi n’Umutungo (RMI) giherereye mu Murenge wa Shyogwe, habereye ikiganiro ku ruhare rw’inzego z’ibanze mu kwimakaza ihame ry'uburinganire no kurwanya ihohoterwa rishingiye ku gitsina.

Iki kiganiro cyateguwe ku bufatanye bw'Akarere, Urwego rw'Igihugu rushinzwe kugenzura iyubahirizwa ry'uburinganire n'ubwuzuzanye bw'abagore n'abagabo mu iterambere ry'Igihugu (GMO) n'abandi bafatanyabikorwa; cyahuje Abakuru b'Imidugudu baherutse gutorwa mu Mirenge ya Shyogwe, Nyamabuye, Cyeza, Muhanga, Nyarusange, Rugendabali na Mushishiro.

Cyanitabiriwe kandi n'Umuyobozi wa GMO Madamu Rose RWABUHIHI, Umuyobozi w’Akarere ka Muhanga Madamu KAYITARE Jacqueline, Inzego z'ubutabera, Inzego z'umutekano, Abahagarariye Amadini n'Amatorero ndetse n'abandi bafatanyabikorwa.

Abayobozi  mu nzego bwite za Leta n’abafatanyabikorwa bari bitabiriye ikiganiro

Mu ijambo rye, afungura iki kiganiro, Umuyobozi w’Akarere, yashimiye Abakuru b'Imidugudu ku cyizere bagiriwe n’abaturage bakabatorera kubahagararira, bityo abasaba kutazatetereza icyo cyizere bagiriwe, ahubwo bagaharanira guteza imbere abaturage bayoboye. Yaboneyeho no kubasaba gukurikirana neza ibiri buvugirwe muri iki kiganiro, ntibibe amasigaracyicaro ahubwo bakazabishyira mu bikorwa, bagaharanira kuyobora Imidugudu izira ihohoterwa kandi yubahiriza ihame ry'uburinganire.

Umuyobozi w’Akarere Mme KAYITARE Jacqueline atangiza iki kiganiro

Nyuma yo gufungura iki kiganiro, hakurikiyeho kuganira ku ruhare rw'inzego z'ibanze mu guteza imbere ihame ry'uburinganire no gufasha abahohotewe. Iki kiganiro cyakorwaga hagati y’abitabiriye ndetse na Pano (Pannel) yari igizwe n'abahagarariye inzego zitandukanye harimo Akarere, Urwego rw’ubushinjacyaha, Polisi na RIB.

Abahagarariye inzego zitandukanye zatanze ikiganiro kuri Pannel

Bamwe mu Bakuru b’Imidugudu bari bitabiriye iki kiganiro

Mu butumwa butandukanye Umuyobozi wa GMO yahaye abitabiriye; yababwiye ko bakwiriye kurushaho gukumira ihohoterwa rishingiye ku gitsina, gutangira amakuru ku gihe, no gushyikiriza inzego z’ubugenzacyaha abantu bakekwaho gusambanya abangavu, kuko ibi bibazo bimaze gufata intera ndende aho batuye.

Umuyobozi Mukuru wa GMO Mme RWABUHIHI Rose atanga ubutumwa

Yasoje iki gikorwa asaba Abakuru b’Imidugudu kuzahigura umuhigo bahize wo kuyobora Umudugudu uzira ihohoterwa kandi wubahiriza ihame ry'uburinganire.

Iki kiganiro ni kimwe mu bikorwa bigize ubukangurambaga bwo kwimakaza iyubahirizwa ry’Ihame ry’uburinganire no kurwanya ihohoterwa rishingiye ku gitsina #GAD2021 buri gukorerwa mu Karere ka Muhanga muri iyi minsi. Biteganyijwe ko ikiganiro nk'iki, ejo kizanahabwa Abakuru b'Imidugudu baherutse gutorwa mu Mirenge ya Kiyumba, Kabacuzi, Rongi, Kibangu na Nyabinoni.

Yanditswe na:

UWINGABIRE Dieudonné (Ag.PRO)