Ku itariki ya 27 Ukuboza 2023, Umuyobozi w’Akarere Madamu KAYITARE Jacqueline ari kumwe n’Umuhuzabikorwa w’Umushinga Igire[1]Jyambere mu Karere ka Muhanga ushyirwa mu bikorwa na DUHAMIC ADRI bashyikirije abanyeshuri 110 ibikoresho by’imyuga bitandukanye bizabafasha gushyira mu bikorwa amasomo y’imyuga bize mu gihe cy’amezi 6 irimo ubudozi, guteka, gukanika ibinyabiziga,gukora amashanyarazi, ubugeni, gutunganya umusatsi n’iyindi.

Mu butumwa bwe, Umuyobozi w’Akarere yasabye abahawe ibikoresho kubyaza umusaruro amahirwe bahawe no gufata neza ibikoresho bashyikirijwe. Yabasabye kuzarangwa n’ubunyangamugayo bakazirikana agaciro k’ibikorwa bakorewe.

Yasabye kandi ababyeyi b’abana bahawe ibikoresho kubaba hafi. Yabibukije ko ibikoresho abana bahawe ari ubwunganizi buje bugamije gufasha ababyeyi gukomeza gufasha abana kugira ngo bagire icyerekezo cy’imibereho.

Umuyobozi w’Akarere yabwiye ababyeyi ati:” Aba bana nubwo bagize amahirwe bakabona uburyo bwo gushakisha imibereho, aya ni amahirwe wowe nk’umubyeyi ubonye, ni ubwunganizi bugushyigikira kugira ngo ukomeze gufasha umwana wawe agire icyerekezo cy’imibereho myiza. Murabizi ko kubaho neza k’umwana, kugira uburere bwiza ku mwana bizana inyungu ikomeye ku muryango umwana akomokamo.” Yabijeje ko ubuyobozi buzakomeza kuba hafi y’abana n’ababyeyi ariko yibutsa ko ababyeyi ari bo bafite inshingano ya mbere yo kwita ku burere n’imibereho y’umwana. Umuyobozi w’Akarere yashimiye abarezi, by’umwihariko ashimira DUHAMIC ADRI yagize uruhare mu kwigisha no gutanga ibikoresho by’imyuga bifite agaciro ka miliyoni 44 ku banyeshuri basoje amasomo.