Ku itariki ya 05 Gicurasi, Umuyobozi w’Akarere wungirije ushinzwe Iterambere ry’Ubukungu Bwana BIZIMANA Eric ari kumwe n’abandi bayobozi batandukanye n’inzego z’umutekano bagiranye ibiganiro n’abarezi n’abanyeshuri bo mu bigo bine by’amashuri byo mu Murenge wa Shyogwe birimo TTC Muhanga, GS Shyogwe, GS St Etienne na St Peter College kuri gahunda y’Ubumwe n’Ubudaheranwa bw’Abanyarwanda.

Mu kiganiro yatanze cyagarutse ku mateka y’u Rwanda na Ndi Umunyarwanda, Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric yagaragaje uruhare rw’abakoloni mu isenyuka ry’ubumwe bw’Abanyarwanda, uburyo ubuyobozi bubi bwateguye Jenoside yakorewe Abatutsi mu 1994, uruhare rw’urubyiruko mu guhagarika Jenoside yakorewe Abatutsi n’ingaruka Jenoside yasigiye Umuryango Nyarwanda.

Visi Meya yabwiye uru rubyiruko ko mu mateka yaranze u Rwanda, indangagaciro y’ubunyarwanda yazaga imbere ya byose. Imibanire y’Abanyarwanda yari ishingiye ku ipfundo ryo kumva ko basangiye Igihugu cy’u Rwanda, ururimi rw’Ikinyarwanda, Umwami wabo no kwemera Imana y’i Rwanda. Bari bafite imigenzo yo y’umuco yabigishaga kuba umwe nk’ubucuti, ubuvandimwe, ubusabane, ubufatanye, ubwizerane, ubworoherane, ubwuzuzanye, kwihangana, kwakira abakugana, kwiyoroshya, kudasumbanya n’indi…

Agendeye kuri izi ndangagaciro zarangaga Abanyarwanda, Visi Meya yasabye urubyiruko gushyira hamwe, gusigasira ubumwe n’ubumwe n’ubudaheranwa by’abanyarwanda, kwirinda ingengabitekerezo ya Jenoside n’amacakubiri.

Urubyiruko kandi rwasabwe kurangwa n’indangagaciro yo gukunda Igihugu, kugira imitekerereze mizima, kwihangana, kugira ubutwari, kubaho ubuzima bufite intego no kugira ikinyabupfura.