Ku itariki ya  19 Gashyantare 2025, Umuyobozi w’Akarere, Madamu KAYITARE Jacqueline, ari kumwe n’inzego z’umutekano mu Karere, bakiriye abanyeshuri bo mu Ishuri Rikuru rya Polisi y’u Rwanda riherereye mu Karere ka Musanze. Aba banyeshuri bari baje mu rugendoshuri rugamije kumenya uko Polisi ifatanya n’ubuyobozi bw’inzego zegereye abaturage mu gukemura ibibazo bibangamira imibereho myiza y’abaturage. Uru rugendo rwari rugamije no gusangira ubunararibonye ku mikoranire y’inzego zitandukanye mu gukomeza iterambere ry’umutekano n’imibereho myiza.

Aba banyeshuri baturutse mu bihugu icyenda ari byo: Botswana,Somalia, South Sudan, Central African Republic, Malawi, Lesotho, Namibia,  Kenya, n’u Rwanda.

Ubuyobozi bw’Akarere bwagaragarije aba ba Ofisiye bakuru ibikorwa bitandukanye byakozwe ku bufatanye bw’Akarere, abafatanyabikorwa b'Akarere, abaturage na Polisi y’Igihugu hagamijwe kuzamura imibereho myiza y’abaturage no kubumbatira umutekano.

Ibi bikorwa birimo kubakira abatishoboye, ibikorwa by'ubuhinzi n'ubworozi, kurwanya imirire mibi n'igwingira, kwita ku isuku, kugarura abana bataye ishuri, kurwanya ibiyobyabwenge, gufasha urubyiruko rutarangije amashuri kwiga imyuga itandukanye no kubaha ibikoresho by'ibanze bibafasha kwiteza imbere n'ibindi.

Mu rwego rwo kwigira ku bikorwa bigaragara, basuye ibikorwa by’urubyiruko rwacikirije amashuri rurimo kwigishwa imyuga mu  Muryango wita ku Iterambere n’Imibereho myiza (Bureau Social de development), Koperative y'abagore bavuye mu bucuruzi butemewe (Abazunguzayi) bakaba bakora ubucuruzi bw’imboga n’imbuto hafi y'isoko rya Muhanga ndetse basura n’ ibikorwa by'urubyiruko rwacikirije amashuri rwigishwa  ubuhinzi n'ubworozi mu Kigo cya Diyoseze ya Kabgayi (CEFOPPAK).

Aba bapolisi  bashimye imikoranire ya Polisi n’inzego zegerejwe abaturage ndetse bagaragaje ko u Rwanda ari Igihugu cy’intangarugero mu bufatanye bwa Polisi n’abaturage mu guteza imbere umutekano.