Ku itariki ya 04 Werurwe, Umuyobozi w'Akarere Wungirije Ushinzwe imibereho myiza Bwana Gilbert MUGABO yakiriye Senateri Prof.  NIYOMUGABO Cyprien na Senateri KANZIZA Epiphanie bo muri Komisiyo ya Sena y'Imibereho y'Abaturage n'Uburenganzira bwa Muntu.

Aba Basenateri baje gusura Ibigo by'Imyuga n'ubumenyingiro mu rwego rwo kumenya ireme ry'uburezi ritangwa n'ibi bigo, kumenya imbogamizi zikigaragara mu guteza imbere amashuri y’imyuga n’ubumenyingiro n’ingamba ziteganyijwe zo kuzikuraho.

Mu kiganiro Abasenateri bagiranye n'Ubuyobozi n'abanyeshuri biga mu Ishuri ry'Imyuga n'Ubumenyingiro rya Muhanga (MTC) n’abiga mu Ishuri ryigisha imyuga rya Mushubati VTC bavuze ko Abagize Inteko Ishinga Amategeko Umutwe wa Sena barimo gusura ibigo by’Imyuga n’Ubumenyingiro hagamijwe kugenzura uko ihame rirebana n’amahirwe angana n’iry’uburinganire yubahirizwa mu mashuri y’imyuga n’ubumenyingiro, kugenzura uko abiga imyuga n’ubumenyingiro bigishwa indangagaciro mbonezamurimo zitegura abiga kwihangira umurimo, kuwunoza bawujyanisha n’ibikenewe ku isoko ry’umurimo n’uko amashuri akorana n’abikorera, kugira amashuri y’imyuga n’ubumenyingiro yigisha kandi agasohora abanyeshuri bashoboye kandi bizewe ku isoko ry’umurimo, kugenzura uko ikoranabuhanga ryimakazwa mu bumenyi butangirwa mu mashuri y’imyuga n’ubumenyingiro n’ibikoresho byifashishwa, kugenzura niba amashuri y’imyuga n’ubumenyingiro afite ibyangombwa bikenewe kugira ngo haboneke ireme ry’uburezi (ibikorwa remezo bijyanye n’integanyanyigisho, imfashanyigisho, abarimu babyize kandi bashoboye, aho bimenyereza umurimo hujuje ibyangombwa) n’ibindi. 

Nyuma yo gusura amashami atandukanye akorera muri ibi bigo no kureba uko abanyeshuri bakurikirana amasomo, aba basenateri bagaragaje ko bishimiye uburere n'ubumenyi butangirwa muri ibi kigo. Bashimye kandi ko abakobwa bitabiriye kwiga imyuga n’ubumenyingiro ndetse no mu barezi hakaba hagaragaramo abakobwa kandi batanga ubumenyi bufite ireme. Bashimye kandi ko abahungu bitabiriye kwiga imyuga yafatwaga nk’iy’abakobwa irimo imyuga yo gutunganya imisatsi no gutegura amafunguro.

Abasenateri basabye abiga muri ibi bigo kurangwa n'indangaciro z'umuco nyarwanda, gukorera ku ntego, gukunda umurimo, gushyira hamwe no kwirinda ibiyobyabwenge.