Ku itariki ya 15 Gashyantare 2024, Umuyobozi w'Akarere Madamu KAYITARE Jacqueline yakiriye itsinda ry'abasirikare bakuru bari mu mahugurwa mu Ishuri Rikuru rya Gisirikare rya Nyakinama (Rwanda Defence Force Command and Staff College Nyakinama) baje mu ruzinduko rw’iminsi ibiri mu Karere ka Muhanga. Ni itsinda ryari riyobowe na Brigadier General Jean Chrysostome NGENDAHIMANA.

Aba basirikare bari mu rugendoshuri rugamije kumenya uko ibikorwaremezo bijyanye n'ingufu z’amashanyarazi bihagaze mu Karere n'uruhare bifite ku iterambere ry'abaturage. Ubuyobozi bw'Akarere bwagaragarije abashyitsi uko Akarere gahagaze mu gukwirakwiza amashanyarazi mu baturage, imiyoboro y'amashanyarazi irimo kubakwa, uruganda rw'amashanyarazi rwa Nyabarongo I n'akamaro ibi bikorwa bifitiye abaturage.

Nyuma y'ibiganiro n'Ubuyobozi bw'Akarere, abasirikare bakuru bari kumwe n’Ubuyobozi bw’Akarere basuye uruganda rukora sima rwa West International Holding LTd ruherereyemu cyanya cy'inganda cya Muhanga. Muri uru ruganda, abasirikare bagaragarijwe ibikorwa bitandukanye by’uru ruganda by’umwihariko bakaba baribanze ku mikoreshereze y’ingufu zikomoka ku mashanyarazi.

Ku munsi wa nyuma w’uruzinduko rwabo mu Karere ka Muhanga, abasirikare bakuru bari kumwe n’Umuyobozi w’Akarere Wungirije ushinzwe iterambere ry’Ubukungu BIZIMANA Eric basuye Urugomero rwa Nyabarongo ya mbere ruherereye mu Murenge wa Mushishiriro, rutanga umuriro ungana na 28MW. Basobanuriwe imikorere yarwo n’akamaro rufite ku iterambere n’imibereho myiza y’abaturage.

Aba basirikare bakomoka mu bihugu bitandukanye, bashimye ibyo u Rwanda rumaze kugeraho mu kwegereza abaturage amashyanyarazi, n’uburyo ibi bikorwa bifasha abaturage mu iterambere n’imibereho myiza yabo.