Ku itariki ya 30 Gicurasi, abagize Komite Nyobozi y’Akarere bakiriye itsinda ry’Abayobozi baturutse muri  Minisiteri y’Ubuzima mu Gihugu cya Centrafrique bayobowe na Dr. Jean Baptiste MADOUNDJI, Umuyobozi Mukuru ushinzwe Farumasi n'ibikorwa by'Ubuvuzi rusange muri Minisiteri y'ubuzima.

Aba bayobozi bakaba baje mu rugendoshuri mu rwego rwo kureba uko urwego rw’ubuzima rukora.

Ibiganiro bagiranye n’ubuyobozi bw’Akarere byibanze ku mikorere y’Ishami ry’ubuzima mu Karere, gahunda ya PBF, Imikorere ya gahunda y’ubwisungane mu kwivuza n'uruhare ifite mu mibereho myiza n’iterambere ry’abaturage n’ibindi. Basuye Ibitaro bya Kabgayi n’Ikigo Nderabuzima cya Kivumu giherereye mu Murenge wa Cyeza aho basobanuriwe imikorere y’Ibitaro n’imikoranire yabyo n’Ibigo nderabuzima. Mu kigo nderabuzima cya Kivumu, Abayobozi muri Minisiteri y’Ubuzima ya Santarafurika bagize umwanya wo kuganira n’Abajyanama b’ubuzima bagaragaza ibikorwa bakora birimo kuvura indwara zitandukanye zirimo Malaria, gukurikirana imikurire y’abana, gufasha abagore batwite kugera kwa muganga n’ibindi bikorwa binyuranye. Basobanuriwe kandi imikoreshereze y’ubwishingizi mu kwivuza, uruhare rw’abajyanama b’ubuzima mu gufasha abaturage n’ibigo by’ubuvuzi ndetse bagaruka no ku mitangire y’agahimbazamusyi #PBF kagenerwa abajyanama b’ubuzima mu rwego rwo kubafasha mu kazi kabo ka buri munsi.

Nyuma yo gusura Ibitaro n’ikigo nderabuzima, abashyitsi basuye kandi  Zipline Rwanda,iki  ikigo kikaba   kijyana amaraso n’imiti mu Bigo nderabuzima n'Ibitaro hifashishijwe indege zitagira abapilote zizwi ku izina rya Drone.Uretse gutwara imiti, zipline ifasha mu gutwara intanga z’amatungo arimo ingurube kugira ngo zigezwe ku borozi mu buryo bworoshye.