Ku itariki ya 14 Ukwakira mu cyumba cy’inama cya Splendid Hotel habereye ibiganiro byahuje abagize Ihuriro ry’Ubumwe n’Ubudaheranwa mu Karere ka  Muhanga. Ni ibiganiro byayobowe n’Intumwa ya Unity Club Intwararumuri Bwana Vincent MUNYESHYAKA, ibi biganiro bikaba byari bifite insanganyamatsiko igira iti:”Indangagaciro na Kirazira, Isoko y’Ubumwe n’Ubudaheranwa by’Abanyarwanda.”

Ibi biganiro byitabiriwe kandi na Hon.Deputé B. KALINIJABO, Madamu UWASE  Patricie na Madamu Carine Olga MURANGWA bo muri Unity Club Intwararumuri, Abagize inama Njyanama y’Akarere, Ubuyobozi bw’Akarere, abahoze ari abayobozi mu nzego zitandukanye, Inzego z’umutekano na Sosiyete sivile. Ibiganiro kandi byitabiriwe n'imiryango ishingiye ku myemerere, urubyiruko n’abandi bafatanyabikorwa.

Mu ijambo ry’ikaze yagejeje ku bitabiriye ibiganiro, Umuyobozi w’Akarere yagarutse ku bikorwa byakozwe ndetse n’ibikomeje gukorwa mu kwezi kwahariwe ubumwe n’ubudaheranwa byAbanyarwanda mu Karereka Muhanga birimo gutanga ibiganiro ku ndangagaciro z’umuco nyarwanda, kubakira abatishoboye inzu y’ubumwe n’ubudaheranwa muri buri murenge, guhuza ibikorwa by’abafatanyabikorwa mu kubaka ubumwe, gutanga ibiganiro ku maradiyo ku bumwe n’ubudaheranwa, gukora ubukangurambaga rusange ku rwego rw’imidugudu muri gahunda yo gusubiza mu buzima rusange abafite ibibazo byihariye n’ibindi.

Muri ibi biganiro, abagize ihuriro bunguranye ibitekerezo ku bibangamiye ubumwe n’ubudaheranwa bw’Abanyarwanda bahereye mu muryango, aho abantu batuye n’aho bakorera, uruhare rw’indangagaciro na kirazira by’umuco Nyarwanda mu guhangana n’ibibangamiye ubumwe n’ubudaheranwa. Baganiriye kandi ku ruhare rw’abagize ihuriro mu gukemura inzitizi zibangamiye ubumwe n’ubudaheranwa by’Abanyarwanda.

Mu ijambo yagejeje ku bitabiriye ibiganiro, Bwana Vincent MUNYESHYAKA yabanje gushimira abatanze ibiganiro, yagarutse ku biganiro byatanzwe birimo uruhare rw’indangagaciro na kirazira mu gukomeza kubaka ubumwe n’ubudaheranwa by’Abanyarwanda ndetse agaruka ku mbogamizi n’inzitizi bikibangamira ubumwe n’ubudaheranwa by’umwihariko mu Karere ka Muhanga.

Bwana MUNYESHYAKA yavuze ko umwanzuro dukwiriye gufata ari ukwibuka ko ubumwe bwacu ari zo mbaraga zacu kandi ko nta mahitamo yandi kuko nta kindi gikwiriye gusimbura Ubumwe n’ubudaheranwa by’Abanyarwanda.

Yavuze kandi tugomba gukomeza kubakira ku muco wacu na kirazira kugira ngo dukomeze kubaka ubumwe n’ubudaheranwa by’Abanyarwanda. Yashimye kandi kuba abitabiriye ihuriro biyemeje kuvugisha ukuri no kwirinda kuba ntibindeba mu byiciro byose haba mu bayobozi, urubyiruko, abakuze n’abandi.

Ihuriro ry'Ubumwe n'Ubudaheranwa mu Karere, ni urubuga rwo kungurana ibitekerezo ku bikorwa byimakaza Ubumwe n'Ubudaheranwa, kurebera hamwe ibyagezweho byo kwishimira, inzitizi zigihari no kuganira ku ngamba zo gusigasira ibyagezweho no gukemura inzitizi zaba zikigaragara.