Ku itariki ya 17 Mutarama, Umuyobozi w’Akarere KAYITARE Jacqueline yakiriye itsinda ry’Abadepite bo muri  Komisiyo y’Ingengo y’Imari n’Umutungo by’Igihugu mu Nteko Ishinga Amategeko, umutwe w’Abadepite. Itsinda ry’aba badepite ryari rigizwe na Depite TUMUSHIME Francine, Depite KANAMUGIRE James na Depite MUKAMPUNGA Epiphanie.

Abadepite bagiranye ibiganiro n’Ubuyobozi bw’Akarere n’ibindi byiciro by’abayobozi mu nzego zitandukanye. Ibi biganiro byari  bigamije gusesengura igipimo cy’ishyirwa mu bikorwa ry’ingengo y’imari y'Akarere y’umwaka wa 2024 - 2025, ingano y’imisoro n’amahoro Akarere kamaze kwinjiza, uko ingengo y’imari yatanzwe hakurikijwe uko yasabwe mu bihembwe, uko imishinga igamije iterambere n’imibereho myiza y’abaturage ishyirwa mu bikorwa, imbogamizi ndetse  n’ingamba zigamije kwihutisha imikoreshereze y’ingengo y’imari y’Akarere. 

Nyuma y’inama, Abadepite basuye  Koperative IABEM ikora ibikorwa by'ubuhinzi n'ubutubuzi bw'imbuto, basuye kandi Ibikorwa by'ubutubuzi bw'ibihingwa ndetse n'amatungo arimo ingurube n'inkoko bikorwa n’Ikigo gishinzwe guteza imbere ubuhinzi n'ubworozi mu Rwanda/Ishami rya Muhanga ndetse  basura n’icyanya cy'inganda mu rwego rwo kureba ibibazo bihari bijyanye no kwimura abantu ku nyungu rusange.

Aba badepite bavuze ko uru ruzinduko rufasha Abaturage kumenya uko ingengo y’imari yatowe n’Inteko Ishinga Amategeko ishyirwa mu bikorwa, uko imishinga igamije iterambere n’imibereho myiza byabo ishyirwa mu bikorwa n’ingamba zihari mu gukemura ibibazo biba byagaragaye.

Bagaragaje kandi ko amakuru bavana muri ibi biganiro afasha abagize Inteko Ishinga Amategeko, Umutwe w’Abadepite kumenya niba ingengo y’imari itorwa igera ku nzego yagenewe kandi ku gihe, no kumenya ibibazo zihura na byo mu mikoreshereze yayo, kugira ngo bizitabweho mu ngengo y’imari ya Leta y’umwaka wa 2025-2026.