Kuri uyu wa 28 Mata 2023, byari ibyishimo byinshi ku baturage bari baje gushyigikira amakipe ahagarariye Akarere ka Muhanga, ubwo kuri Stade ya Muhanga haberaga imikino y’umupira w’amaguru mu marushanwa y’Umurenge KAGAME Cup 2022-2023 mu bahungu n’abakobwa yahuje amakipe ahagarariye Akarere ka Muhanga n’Akarere ka Ruhango ku rwego rw’Intara y’Amajyepfo, iyi mikino ikarangira amakipe yombi ahagarariye Akarere ka Muhanga yegukanye itsinzi.

Iyi mikino yombi yatangijwe ku mugaragaro na Guverineri w’Intara y’Amajyepfo Madamu KAYITESI Alice ndetse initabirwa n’Abayobozi mu Nzego zinyuranye bo mu Turere twombi n’abaturage benshi bari baje gushyigikira amakipe yabo.

Mu mukino w’umupira w’amaguru mu bagore wahuje ikipe y’Umurenge wa Mwendo yari ihagarariye Akarere ka Ruhango n’iy’ Umurenge wa Shyogwe yari ihagarariye Akarere ka Muhanga, warangiye ikipe ya Shyogwe itsinze iya Mwendo ibitego 3-0.

Naho, mu mukino w’amaguru mu bagabo, umukino wahuje ikipe y’Umurenge wa Muhanga wari uhagarariye Akarere ka Muhanga n’iy’Umurenge wa Kabagari yari ihagarariye Akarere ka Ruhango, warangiye amakipe yombi aguye miswi mu minota 90 isanzwe y’umukino anganya igitego 1 kuri 1 hitabazwa Penaliti, aho uyu mukino warangiye ikipe y’Umurenge wa Muhanga itsinze penaliti 4 kuri 1 y’ikipe y’Umurenge wa Kabagari. Aya makipe yatsinze akazakomereza muri ½.

Umuyobozi w’Akarere ka Muhanga Madamu KAYITARE Jacqueline yashimiye abaturage baje gushyigikira amakipe yabo ndetse ashimira n’amakipe yitabiriye aya marushanwa y’Umurenge KAGAME CUP 2023, by’umwihariko anashimira ubuyobozi bw’igihugu kuri gahunda nziza nk’iyi bwashyizeho.

Amarushanwa y’Umurenge KAGAME Cup agamije kwimakaza ihame ry’imiyoborere myiza, gukorera mu mucyo no gukangurira Abanyarwanda umuco wo guhiganwa hagamijwe guteza imbere impano z’abakinnyi hirya no hino mu Mirenge  ndetse no gutanga ubutumwa ku zindi gahunda za Leta.

Yanditswe na NDATEBA VALENS

PRMCO