Kuri uyu wa 07 Mata 2023, mu Midugudu yose igize Akarere ka Muhanga ndetse n’ahandi hose mu Gihugu hatangijwe icyumweru cy'icyunamo cyo kwibuka ku nshuro ya 29 Jenoside yakorewe Abatutsi.

Mu karere ka Muhanga icyumweru cy’icyunamo cyatangirijwe ku Rwibutso rwa Jenoside yakorewe Abatutsi rwa Kiyumba ku rwego rw'Akarere, aho abaturage bifatanyije na Hon.Deputée UWANYIRIGIRA Marie Florence,Ubuyobozi bw'Akarere,IBUKA,Inzego z'umutekano  n'abandi bayobozi mu nzego zitandukanye.

Iki gikorwa cyabanjirijwe no gushyira indabo kuri uru rwibutso rwa Kiyumba, ruruhukiyemo imibiri isaga 730.

Umuyobozi w'Akarere Madamu KAYITARE Jacqueline yasabye Abarokotse Jenoside yakorewe Abatutsi mu 1994, gukomera, guharanira kwiyubaka, no guharanira ko bitazongera kubaho ukundi ndetse avugako hazakorwa ibikorwa bitandukanye byo kwibuka ahantu hanyuranye mu Karere, aboneraho no gusaba abaturage kwitwararika muri iki gihe cyo kwibuka.

Depite Hon. UWANYIRIGIRA Marie Florence yasabye abaturage bitabiriye iki igikorwa cyo kwibuka kuba intangarugero mu kurwanya ingengabitekerezo ya Jenoside no gufata mu mugongo Abarokotse Jenoside yakorewe Abatutsi mu 1994.

Abaturage mu Midugudu yose kandi,bahawe ikiganiro"KWIBUKA TWIYUBAKA" kijyanye no kwibuka ku nshuro ya 29 Jenoside yakorewe Abatutsi mu 1994.

Minisiteri y'Ubumwe bw'Abanyarwanda n'Inshingano Mboneragihugu (MINUBUMWE) mu butumwa bwayo bukubiye mu kiganiro"TWIBUKE TWIYUBAKA"muri iki gihe cyo kwibuka ku nshuro ya 29 Jenoside yakorewe Abatutsi mu 1994, ikangurira abanyarwanda gukomeze guha icyubahiro abayizize, gufata mu mugongo Abayirokotse, kwimakaza umuco w'amahoro, kwamaganira kure ibikorwa byose ndetse n'amagambo yose agaragaramo ingengabitekerezo ya Jenoside.

Yanditswe na NDATEBA VALENS

PRMCO