Ku itariki ya 23 Ugushyingo 2025, Umuyobozi w'Akarere  Madamu KAYITARE Jacqueline yifatanyije n'Ubuyobozi n'Abakirisitu ba Diyoseze ya Kabgayi mu birori byo kwizihiza Yubile y'Umuryango ifite insanganyamatsiko igira iti:"Urugo nirurangamire  Kristu we Soko y'Amizero, ubuvandimwe n'amahoro."

Ni ibirori byabimburiwe n'Igitambo cya Misa cyatuwe na Nyiricyubahiro Musenyeri Balthazar NTIVUGURIZWA, Umwepiskopi wa Diyoseze ya Kabgayi. Ibi birori kandi byahujwe no guha ikimenyetso cy'ishimwe imiryango y'ikitegererezo, abitangiye ubusugire bw'ingo n'abandi.

Mu butumwa bwe, Umuyobozi w'Akarere yashimye Diyoseze ya Kabgayi yashyizeho Komisiyo ishinzwe kurinda umuryango no kuwubungabunga. Yibukije ko buri wese agira umuryango akomokamo akaba ari na yo mpamvu buri wese akwiriye kumva ko afite inshingano zo kuwitaho, kuwurinda no guharanira icyawuteza imbere.

Yashimiye abahawe ishimwe barimo ababaye icyitegererezo mu kwita ku muryango, abitangiye ubusugire bw'ingo n’ibindi byiciro byagize uruhare mu kubaka umuryango urangwa n'amahoro.

Umuyobozi w’Akarere yavuze ko hari imiryango igifite ibibazo rimwe na ri mwe usanga bikomoka ku gutakaza indangagaciro, umuco na kirazira n’ibindi. Yasabye abagize umuryango guhuriza hamwe imbaraga, kujya inama, gukorera hamwe, kwita ku rubyiruko, gutegura ingo nshya no kuziherekeza kugira ngo twubake imiryango myiza y’ejo hazaza.

Umuyobozi w’Akarere yasoje ubutumwa bwe, akangurira buri wese kuzitabira ibikorwa  by’ubukangurambaga bw’iminsi 16 yahariwe kurwanya ihohotera rishingiye ku gitsina buzatangira ku itariki ya 25 Ugushyingo 2025.