Kuri uyu wa 29 Mata 2023, ku rwego rw’Akarere, Umuganda rusange usoza Ukwezi kwa Mata 2023 wabereye mu Murenge wa Kabacuzi aho Guverineri w’Intara y’Amajyepfo KAYITESI Alice, ari kumwe n’Ubuyobozi bw'Akarere, Abajyanama b’Akarere n'Inzego z'Umutekano, bifatanyije n'abaturage bo mu Kagari ka Ngarama, Umudugudu wa Kabuga muri uyu muganda, ahasibuwe ndetse hanacukurwa imirwanyasuri ku buso bungana na 8.5HA.

Uyu muganda rusange usoza Ukwezi kwa Mata 2023 wabereye no mu yindi Mirenge yose igize Akarere ka Muhanga, aho Abayobozi n'abaturage bawuzindukiyemo. Uyu muganda waranzwe n'ibikorwa bitandukanye birimo guhanga no gusibura imirwanyasuri, inzira z'amazi, kubakira abatishoboye amacumbi n'ubwiherero, guhanga no gutunganya imihanda n'ibiraro, kuzirika ibisenge by'inzu mu rwego rwo gukumira ingaruka ziterwa n'ibiza n'ibindi bikorwa bishingiye ku bumenyi bwihariye.

Nyuma y'umuganda, hose Abayobozi batanze ubutumwa butandukanye, by’umwihariko Guverineri w’intara y’Amajyepfo KAYITESI Alice yagejeje ubutumwa butandukanye ku baturage bo mu Murenge wa Kabacuzi burimo n’ubutumwa bwa Minisiteri y’ibikorwa by’ubutabazi (MINEMA) bujyanye n'ibikorwa byo gukumira ibiza mu bihe by'imvura; ubutumwa bwa Minisiteri y’Ubutegetsi bw’Igihugu (MINALOC) bujyanye no gutangiza ku mugaragaro ubukangurambaga bw'isuku n'isukura; ndetse n’ibindi bikorwa bigamije guteza imbere imibereho myiza y’abaturage.

Nyuma y'umuganda rusange kandi, muri uyu Murenge wa Kabacuzi kimwe no mu yindi Mirenge yose igize Akarere ka Muhanga hatangijwe ku mugaragaro ubukangurambaga kuri gahunda y'Igihugu y’Isuku Hose, ijyanye n’isuku n’isukura aho abaturage basobanuriwe akamaro k’isuku ndetse banakangurirwa kurangwa n’isuku no kuyigira umuco haba ku mubiri, aho bakorera n’aho batuye.

Yanditswe na NDATEBA VALENS

PRMCO