Ku itariki ya 13 Ukwakira 2025 habaye  Inama y’Ihuriro ry’Ubumwe n’Ubudaheranwa ku rwego rw’Akarere  ku nsanganyamatsiko igira iti: “Twimakaze ubumwe n'ubudaheranwa"

Ibi biganiro byitabiriwe n’Intumwa za Unity Club Intwararumuri harimo PhD BAYISENGE Jeannette, Bwana KABONEKA Francis, hari kandi Hon.Senateur Emmanuel HAVUGIMANA; Hon.Deputé B.KALINIJABO, abagize Inama Njyanama y’Akarere, Ubuyobozi bw’Akarere, abahoze ari abayobozi mu nzego zitandukanye, imiryango ishingiye ku myemerere, Inzego z’umutekano, urubyiruko, Sosiyete sivile n'abandi.

Mu ijambo ry’ikaze, Umuyobozi w’Akarere Madamu KAYITARE Jacqueline yagaragarije abitabiriye ibiganiro uko imyanzuro y’inama y’Ihuriro iheruka yashyizwe mu bikorwa mu rwego rwo gukemura ibibazo byagaragajwe nk'imbogamizi ku bumwe n'ubudaheranwa, gukumira no kurwanya ingengabitekerezo ya Jenoside no kwimakaza indangagaciro z'umuco Nyarwanda mu rubyiruko.

Umuyobozi w’Akarere yavuze ko hatanzwe ibiganiro mu kwimakaza Ubumwe n’ubudaheranwa ndetse no ku itegeko ryerekeranye n’icyaha cy’ingengabitekerezo ya Jenoside n’ibyaha bifitanye isano mu byiciro binyuranye, hatanzwe kandi ibiganiro by’ubumwe n’ubudaheranwa binyujijwe mu itangazamakuru, imiryango ishingiye ku myemerere yaganirijwe ku kugira uruhare mu kwirinda amacakubiri n’ingengabitekerezo ya Jenoside, Abagize Komite Nyobozi basuye Club y’Ubumwe n’Ubudaheranwa mu igororero rya Muhanga n’ibindi bikorwa bitandukanye.

Mu butumwa bwe, Intumwa ya Unity Club Intwararumuri PhD Bayisenge Jeannette yasabye abitabiriye ibiganiro gusubiza amaso inyuma bakareba umusaruro bavanye mu biganiro biheruka no kugira uruhare mu kubigeza ku rwego rw’umudugudu. Yasabye ababyeyi kuba ijisho ry’urubyiruko, kubigisha kunyura mu nzira nziza no kubabera urumuri kugira ngo babafashe kwirinda amacakubiri n’ingengabitekerezo ya jenoside.