ku itariki ya 27 Nzeri 2025 mu  midugudu habaye Umuganda rusange usoza ukwezi kwa Nzeri wibanze ku bikorwa  byo gutegura imyobo izaterwamo ibiti no gusibura imirwanyasuri

Umuyobozi w'Akarere Madamu KAYITARE Jacqueline ari kumwe n’Umuyobozi w’Akarere wungirije ushinzwe imibereho myiza y’Abaturage Bwana Gilbert MUGABO, abafatanyabikorwa b'Akarere barimo IREMBO, JADF, Koperative COMAR n'inzego z'umutekano bifatanyije n'abaturage bo mu Kagari ka Butare mu Murenge wa Kabacuzi mu muganda wo gusibura imirwanyasuri no gucukura imyobo izaterwamo ibiti.

Mu butumwa, yagejeje ku baturage bitabiriye umuganda, umuyobozi w’Akarere Madamu KAYITARE Jacqueline yasabye abaturage  kwitabira imirimo y’igihembwe cy’ihinga bitabira guhinga ubutaka bwose bwagenewe ubuhinzi no gukoresha inyongeramusaruro. Yabakanguriye kandi kwita ku isuku, kujyana abana bose ku ishuri, gutanga umusanzu w’ubwisungane mu kwivuza no gusigasira ubumwe bw’abagize umuryango.

By’uwihariko, Umuyobozi w’Akarere yakanguriye abakora umurimo w’ubucukuzi bw’amabuye y’agaciro kwizigamira muri Ejo heza.  Yavuze ko abakora ubucukuzi bw’amabuye y’agaciro baba biganjemo abakiri bato, bityo ko bakwiye kureba kure amafaranga binjiza ntibayapfushe ubusa, ahubwo bakizigamira kuko uko bagenda basaza batakaza imbaraga. Yabwiye abakorera muri Koperative COMAR ko byaba bibabaje umucukuzi wiboneraga  icyo akeneye cyose akiri muto, asaza asabiriza bitewe n'uburangare, dore ko usibye kwizigamira kuri konti bisanzwe, Leta yanabashyiriyeho ubwiteganyirize bwa Ejo Heza, bakwifashisha batanga amafaranga make make Leta ikanabunganira bakazahabwa pansiyo bageze mu zabukuru.

Yagize  ati: "Byaba bibabaje umuntu wakoreye amafaranga ashaje ntakintu afite, kubera ko  aka kazi kagera aho kagashirana n'imbaraga z'ugakora, none se uzabaho ute nusaza, ntawe uzaba akureba niyo mpamvu abakora ubucukuzi mukwiye kwizigamira hakiri kare mugifite izo mbaraga, mukazasaza neza mudasabiriza kandi mwarihaye". Yabashishikarije gukora bakizigamira bagifite imbaraga kuko uko bazikoresha zishira vuba.