Ku itariki ya 7 Mata 2025, ku Rwibutso rwa Jenoside yakorewe Abatutsi rwa Kabgayi, habereye  igikorwa cyo gutangiza icyumweru cy’icyunamo n’iminsi 100 yo Kwibuka ku nshuro ya 31 Jenoside yakorewe Abatutsi mu 1994.

Ni igikorwa cyitabiriwe na Depite KALINIJABO Barthelemy,  Perezida w’Inama Njyanama y’Akarere Bwana NSHIMIYIMANA Gilbert, Komite Nyobozi y’Akarere, Abajyanama mu nama Njyanama, Nyiricyubahiro Mgr Ntivuguruzwa Barthazar Umwepiskopi wa Diocese ya Kabgayi, Mgr Kabayiza Louis Pasteur,  Umwepiskopi wa Diyoseze ya EAR-Shyogwe, Umuyobozi w'Ururembo rwa ADEPR Nyabisindu, Mgr Smaragde Mbonyintege, Umushumba wa Diocese ya Kabgayi uri mu kiruhuko cy’izabukuru, Abayobozi ba IBUKA, inzego z’umutekano n’abandi bayobozi mu nzego zitandukanye.

Ni igikorwa cyabimburiwe no gushyira indabo ku mva iruhukiyemo imibiri y’Abatutsi bashyinguye mu Rwibutso rwa Kabgayi.

Mu ijambo ry’Ikaze, Umuyobozi w’Akarere Madamu KAYITARE Jacqueline yihanganisha abarokotse jenoside yakorewe Abatutsi mu 1994. Yavuze ko iminsi ijana yo kwibuka ari iminsi yo kuzirikana by’umwihariko amateka aremereye yaranze u Rwanda ndetse akaba n’igihe cyo guca bugufi no guha icyubahiro abazize jenoside yakorewe abatutsi no kuzirikana ububi bwa Jenoside n’ingaruka zikomeye yasigiye Igihugu cyacu. 

Yavuze ko mu rwego rwo kwitegura kwibuka ku nshuro ya 31 jenoside yakorewe Abatutsi mu 1994 hakozwe ibikorwa bitandukanye birimo kwegera abarokotse Jenoside, kubahumuriza no kubaha ubufasha. Hatanzwe kandi n’Ikiganiro ku bufatanye n’inzego z’ubutabera hagamijwe gusobanurira abaturage ibijyanye n’icyaha cya jenoside n’icyaha cy’ingengabitekerezo ya Jenoside n’ibindi byaha bifitanye isano na yo.

Umuyobozi w’Akarere yashimiye Leta yashyizeho ingamba hagamijwe kubaka ubumwe n’ubudaheranwa no kubanisha Abanyarwanda, gusa yagaragaje ko hakiri inzitizi zibangamiye ubumwe n’ubudaheranwa zirimo kuba hari abakibona mu mbonerahamwe y’amoko, kuba hari abadatanga amakuru y’ahari imibiri y’abazize  jenoside yakorewe abatutsi ngo bashyingurwe mu cyubahiro kibakwiriye.

Yasoje ashimira Ingabo zari iza RPA Inkotanyi zahagaritse Jenoside yakorewe Abatutsi mu 1994 ndetse ashimira n’abarokotse jenoside yakorewe Abatutsi bataheranywe n’agahinda ahubwo bagafatanya n’abandi kwiyubakira Igihugu no kubungabunga ubumwe bw’Abanyarwanda.

Mu ikiganiro cyari gifite insanganyamatsiko igira iti: “Jenoside yakorewe Abatutsi mu 1994, isomo ku Banyarwanda, ku mahanga n’Ibihugu byo mu Karere” cyatanzwe na Depite KALINIJABO Barthelemy yagarutse ku ruhare rw’abakoroni mu gusenya indangagaciro n’ubumwe bw’Abanyarwanda n’ingaruka za Jenoside yakorewe Abatutsi mu Karere u Rwanda ruherereyemo.