Ejo kuwa gatanu, tariki ya 24 Kamena 2022 muri Centre Culturel MUHANGA, habereye igikorwa cyo kwibuka abakoreraga Leta mu yahoze ari Perefegitura ya Gitarama, muma Komine ya Nyamabuye, Rutobwe, Mushubati, Bulinga, Nyakabanda na Nyabikenke bazize Jenoside yakorewe Abatutsi mu 1994. Iki gikorwa, kitabiriwe n'Abajyanama, abayobozi hamwe n'abakozi b'Akarere, IBUKA, Abayobozi b'Amashami y'Ibigo bya Leta bikorera i Muhanga, inzego z'umutekano n'abahagarariye imiryango y'abahoze bakorera Leta mu nzego zavuzwe haruguru bishwe muri Jenoside yakorewe Abatutsi mu 1994.

Iki gikorwa cyaranzwe n’umuhango wo gushyira indabo kuri Monument iriho amazina ya bamwe mu bahoze bakorera inzego zavuzwe haruguru bishwe muri Jenoside, ubutumwa butandukanye binyuze mu ndirimbo, ubwa IBUKA ndetse n’uhagarariye imiryango ifite ababo bibukwaga.

Mu ijambo yagejeje ku bitabiriye iki gikorwa; Umuyobozi w’Akarere Madamu KAYITARE Jacqueline yihanganishije abo mu miryango ifite ababo bibukwaga n'abarokotse Jenoside muri rusange, ndetse anashima ubutwari bagize ntibaheranwe n'agahinda ahubwo bagafata iya mbere mu kongera kwiyubakira Igihugu. Yanaboneyeho gushima inkotanyi zahagaritse Jenoside ndetse asoza asaba abakozi b'Akarere gukomeza kunga ubumwe no gukora neza nta macakubiri cyangwa ivangura kuko ari bwo bazaba bahaye agaciro abahoze bakorera Leta mu nzego zavuzwe haruguru bazize Jenoside yakorewe Abatutsi mu 1994.

Yanditswe na:

UWINGABIRE Dieudonné (Ag.PRO)