Kuri uyu wa 16 Kamena 2023, ku Biro by’Akarere ka Muhanga, habereye igikorwa cyo kwibuka ku nshuro ya 29 abakoreraga Leta mu yahoze ari Perefegitura ya Gitarama, mu ma Komine ya Nyamabuye, Rutobwe, Mushubati, Bulinga, Nyakabanda na Nyabikenke bazize Jenoside yakorewe Abatutsi mu 1994. Iki gikorwa, kitabiriwe n'Abajyanama, abayobozi hamwe n'abakozi b'Akarere, IBUKA, inzego z'umutekano n'abahagarariye imiryango ifite ababo bakoreraga Leta mu nzego zavuzwe haruguru bazize Jenoside yakorewe Abatutsi mu 1994.

Iki gikorwa cyabimburiwe n’umuhango wo gushyira indabo kuri Monument iriho amazina ya bamwe mu bahoze bakorera inzego zavuzwe haruguru bishwe muri Jenoside yakorewe Abatutsi mu 1994, ubutumwa butandukanye binyuze mu ndirimbo, ubwa IBUKA ndetse n’uhagarariye imiryango ifite ababo bibukwaga.

Umuyobozi w’Akarere Madamu KAYITARE Jacqueline, mu ijambo yagejeje ku bitabiriye iki gikorwa, yihanganishije abo mu miryango ifite ababo bibutswe n'abarokotse Jenoside muri rusange, ndetse anashima ubutwari bagize ntibaheranwe n'agahinda ahubwo bagafata iya mbere mu kongera kwiyubakira Igihugu. Yanaboneyeho gushima inkotanyi zahagaritse Jenoside ndetse asoza asaba abakozi b'Akarere gukomeza kunga ubumwe no gukora neza nta macakubiri cyangwa ivangura kuko ari bwo bazaba bahaye agaciro abahoze bakorera Leta mu nzego zavuzwe haruguru bazize Jenoside yakorewe Abatutsi mu 1994.

Yanditswe na:

NDATEBA VALENS

PRMCO