Ku itariki ya 22 Ugushyingo 2023, Umunyamabanga wa Leta muri Minisiteri y’ubutabera ushinzwe Itegeko Nshinga n’andi mategeko akaba n’imboni y’Akarere Madamu NYIRAHABIMANA Solina yasuye Akarere ka Muhanga.

Minisitiri NYIRAHABIMANA yagiranye inama na Komite Nyobozi y’Akarere, abayobozi b’amashami ku Karere n’inzego z’umutekano. Iyi nama yibanze ku ishyirwa mu bikorwa ry’imihigo y’Akarere y’umwaka wa 2023-2024.

Ubuyobozi bw’Akarere bwagaragarije Minisitiri ko mu mwaka w’imihigo wa 2023-2024, Akarere kahize imihigo 106. Muri iyi mihigo, 32 iri mu nkingi y’ubukungu, 53 iri mu mibereho myiza naho imihigo 21 ikaba mu nkingi y’imiyoborere myiza.

Muri iyi nama hagaragajwe imwe mu mishinga minini y’iterambere Akarere karimo gukora.

Muri yo, hari umuyoboro mugari w’amazi wa Rwasare-Nyagasozi-Matyazo-Rukaragata ufite 26 km urimo gusanwa, gusana no kwagura umuyoboro w’amazi wa Km 63 wo muri Gikomero-Kazabagarura mu Murenge wa Nyarusange, gukora amaterasi kuri hegitari 100, kunganira abahinzi ku mafumbire mvaruganda n’imbuto z’indobanure, gutanga inka muri gahunda ya girinka, kubaka Inzu z’ababyeyi (Maternities) ku bitaro bya Kabgayi no ku kigo nderabuzima cya Buramba, kurangiza kubaka umuhanda wa Kabulimbo wa Km 6.94 mu Mujyi wa Muhanga, kubaka imiyoboro y’amashanyarazi ku bufatanye na REG izaha ingo 20,947 umuriro w’amashanyarazi n’indi mishinga itandukanye.

Nyuma yo kuganira ku mihigo, Minisitiri NYIRAHABIMANA Solina ari kumwe n’ubuyobozi bw’Akarere basuye inyubako izakoreramo ibiro by'Umurenge wa Nyamabuye bareba aho imirimo yo kuwubaka igeze. Kubaka umurenge wa Nyamabuye akaba ari kimwe mu bikorwa bikubiye mu mihigo y’Akarere ya 2023-2024.