Ibi byatangarijwe mu birori byo kwizihiza Umunsi Mpuzamahanga w'Umugore kuri uyu wa 08Werurwe 2023  aho ku rwego rw'Intara y'Amanyepfo byabereye mu Karere ka Muhanga mu Murenge wa Rongi, Akagari ka Karambo mu Mudugudu wa Gifurwe.

Muri ibi birori abaturage bifatanyije na Guverineri w'Intara y'Amanyepfo Madamu KAYITESI Alice, Ubuyobozi bw'Akarere, Uhagarariye CNF ku rwego rw'Intara, Inzego z'umutekano n'abafatanyabikorwa batandukanye.

Insanganyamatsiko y'uyu Mwaka wa2023 iragira iti: “Ntawe uhejwe: guhanga udushya n’ikoranabuhanga biteza imbere Uburinganire”.

Muri rusange ibi birori byo kwizihiza Umunsi Mpuzamahanga w'Umugore byaranzwe n'imurikabikorwa ry'ibikorwa by'Amakoperative n'amatsinda y'abagore atandukanye bishingiye ku iterambere ry'umugore,kwishimira ibyagezweho n'umugore mu mibereho myiza,ubukungu n'iterambere ndetse n'ubuhamya bw'abagore biteje imbere babikesha Imiyoborere myiza.

Uyu munsi kandi wanaranzwe no kuremera imiryango itishoboye ahatanzwe inka ,amatungo magufi, ibiryamirwa, imashini zidoda, ibikoreaho by'ishuri kubana babyariye iwabo biga imyuga, imyenda ndetse n'ibindi.

Bumwe mu buhamya bwagurutsweho kuri uyu munsi bwagaragazaga ko aho umugore ageze uyu munsi mu iterambere abikesha imiyoborere myiza y'Ubuyobozi bw'Igihugu burajwe ishinga no guharanira iterambere ry'umugore hatezwa imbere ihame ry’uburinganire biciye muri gahunda za Leta zitandukanye.

Guverineri yashimiye abagore mu bikorwa bitandukanye bamuritse abizeza ko Ubuyobozi buzakomeza kubaba hafi ndetse akangurira abibumbiye mu Makoperative n’Amatsinda, kimwe n'abandi bagore muri rusange kwizigama hakoreshejwe ikoranabuhanga.

Yanditswe na

NDATEBA VALENS

PRMCO