Ku itariki ya 29 Mata, Murenge wa Kabacuzi, ku bufatanye bw'Akarere n'Itorero Presbyterienne mu Rwanda; Presbytery ya Gitarama imiryango 16 yo mu Mirenge ya Kabacuzi na Cyeza yorojwe inka mu rwego rwo gufasha abagize iyi miryango kwivana mu bukene.

Ni igikorwa cyitabiriwe n'Umuyobozi w'Akarere wungirije Ushinzwe Iterambere ry'ubukungu Bwana BIZIMANA Eric, Umuvugizi wa EPR Presbytery ya Gitarama Reverand SIBOMANA Fidele, Abanyabanga nshingwabikorwa b’Imirenge ya Kabacuzi na Cyeza n'abandi bayobozi mu nzego zitandukanye.

Nyirabagisha Esperance; umwe mu baturage borojwe inka yashimye Umukuru w'Igihugu wazaniye Abanyarwanda Gahunda ya girinka, yishimiye ko babonye amata ndetse n’ifumbire izabafasha kuzamura umusaruro w'ubuhinzi.

Mu ijambo rye, Umuyobozi w’Akarere wungirije ushinzwe Iterambere ry’Ubukungu Bwana BIZIMANA Eric yashimye ubufatanye burangwa hagati y’Akarere n’Itorero Presbyterienne mu Rwanda. Yashimye uruhare rw’iri torero mu guteza imbere imibereho myiza y’abaturage by'umwihariko uruhare rwabo mu rugendo rwo gufasha Abaturage kwikura mu bukene. Yasabye aborojwe inka kuzifata neza no kuzirikana ko bazitura bagenzi babo igihe zizaba zimaze kubyara.

Mu Karere ka Muhanga, Itorero rya EPR rikora ibikorwa bitandukanye bigamije guteza imbere imibereho myiza y’abaturage birimo kwishyurira abana amafaranga y’ishuri, kubaha ibikoresho by’ishuri ndetse no kubafasha gufatira ifunguro ku ishuri. Mu buzima, Itorero rya EPR ritanga amafaranga y’ubwisungane mu kwivuza ndetse  bakavuza abanyeshuri barihirwa n’iri torero mu mashuri abanza n’ayisumbuye. Bagira kandi uruhare mu gufasha imiryango itishoboye kubona aho kuba ndetse bakabafasha kwibumbira mu matsinda mu rwego rwo kubasha gukora imishinga iciriritse ibafasha kwiteza imbere.