Kuri uyu wa kane, tariki ya 02 Kamena 2022, ku Rwibutso rwa Jenoside yakorewe Abatutsi rwa Kabgayi, habereye igikorwa cyo kwibuka ku nshuro ya 28 Jenoside yakorewe Abatutsi mu 1994 no gushyingura mu cyubahiro imibiri 21 y’abazize Jenoside yabonetse ahantu hatandukanye mu Karere ka Muhanga. Iki gikorwa kitabiriwe na Minisitiri w’Ubumwe bw’Abanyarwanda n’Inshingano Mboneragihugu Hon. Dr BIZIMANA Jean Damascène, Abasenateri, Guverineri w’Intara y’Amajyepfo, Abadepite, Ubuyobozi bw’Akarere, IBUKA n'abandi Bayobozi mu nzego zitandukanye.

 Abayobozi batandukanye bari bitabiriye iki gikorwa

Iki gikorwa, cyabanjirijwe no kujya gushyira indabo mu mugezi wa Nyabarongo no ku rwibutso rwa Ngororero, mu rwego rwo kwibuka Abatutsi bakuwe i Kabgayi muma Bus bakajya kuhicirwa mu gihe cya Jenoside yakorewe Abatutsi.

Mu ijambo ry'ikaze yagejeje ku mbaga yari iteraniye I Kabgayi, Umuyobozi w’Akarere Madamu KAYITARE Jacqueline yashimiye abitabiriye ndetse anagaruka ku mateka ya Jenoside yakorewe Abatutsi i Kabgayi. Yaboneyeho no kwihanganisha imiryango ifite abayo bashyinguwe mu cyubahiro uyu munsi hamwe n'abatarabona imibiri y'ababo ngo ishyingurwe mu cyubahiro ndetse anashimira abahagaritse Jenoside, bakagarura umutekano n'ituze mu Gihugu, bakimakaza Ubumwe n'Ubwiyunge.

Umuyobozi w’Akarere ageza ijambo ry’ikaze ku bitabiriye iki gikorwa

Abitabiriye iki gikorwa, banahawe ikiganiro "KWIBUKA-TWAHISEMO KUBA UMWE" cyatanzwe na Senateri Dr HAVUGIMANA Emmanuel, aho yibanze ku ruhare rw'Ingengabitekerezo ya Jenoside mu gusenya ubumwe bw'Abanyarwanda kugeza kuri Jenoside yakorewe Abatutsi. Muri iki kiganiro, yifashishije ingero z'amateka y'itotezwa ry'Abatutsi mu cyahoze ari Perefegitura ya Gitarama ndetse anagaruka ku ruhare rwa bamwe mu Barinzi b'Igihango mu kurokora Abatutsi ndetse no mu kwimakaza Ubumwe n'Ubwiyunge nyuma ya Jenoside, asaba buri wese kububumbatira

Senateri Dr HAVUGIMANA Emmanuel atanga ikiganiro "KWIBUKA-TWAHISEMO KUBA UMWE"

Mu ijambo ry’Umushyitsi Mukuru, Minisitiri w’Ubumwe bw’Abanyarwanda n’Inshingano Mboneragihugu Hon. Dr BIZIMANA Jean Damascène yabanje kugaruka ku mateka y'itotezwa ryakorewe Abatutsi mu myaka ya mbere ya Jenoside yakorewe Abatutsi mu 1994, cyane cyane mu cyahoze ari Perefegitura ya Gitarama.

Minisitiri w’Ubumwe bw’Abanyarwanda n’Inshingano Mboneragihugu Hon. Dr BIZIMANA Jean Damascène ageza ijambo ku bitabiriye iki gikorwa

Asoza yibutsa abitabiriye impamvu n'akamaro ko Kwibuka, aho yavuze ko kwibuka Jenoside yakorewe Abatutsi mu Rwanda bitagamije guhembera urwango, ahubwo ari ukwibuka amateka mabi kugira ngo Abanyarwanda birinde ko atagomba kugaruka, ndetse anasaba abitabiriye gukomeza kubumbatira Ubumwe bw'Abanyarwanda no guharanira guteza imbere Igihugu mu nkingi zose.

Iki gikorwa cyasojwe n’umuhango wo gushyingura mu cyubahiro imibiri 21 y'abazize Jenoside yakorewe Abatutsi mu 1994, yabonetse ahantu hatandukanye mu Karere ka Muhanga ndetse no gushyira indabo kuri uru Rwibutso mu rwego rwo kwibuka no kunamira inzirakarengane zose hamwe 12,128 ziruruhukiyemo. Mu bindi byaranze iki gikorwa, harimo ubutumwa bw’Abayobozi batandukanye, ubuhamya, ndetse n’ubutumwa bwo kwibuka no kurwanya ingengabitekerezo ya Jenoside bwatanzwe binyuze mu ndirimbo zitandukanye.

Yanditswe na:

UWINGABIRE Dieudonné (Ag.PRO)

ANDI MAFOTO YARANZE IKI GIKORWA