Ku itariki ya 23 Gicurasi 2025, Guverineri w'Intara y'Amajyepfo Madamu Alice KAYITESI ari kumwe n'Umuyobozi w'Akarere Ka Muhanga Madamu KAYITARE Jacqueline, Umuyobozi w’agateganyo w’Akarere ka Nyanza Bwana KAJYAMBERE Patrick n'inzego z'umutekano bifatanyije n'Ubuyobozi bwa Diyoseze Gatolika ya Kabgayi n'Ibigo biyishamikiyeho mu gikorwa cyo Kwibuka ku nshuro ya 31 Jenoside yakorewe Abatutsi mu 1994.

Ni igikorwa cyabimburiwe n'igitambo cya misa cyayobowe na Nyiricyubahiro Mgr NTIVUGURUZWA Balthazar, Umwepiskopi wa Diyoseze ya Kabgayi ndetse n'urugendo rwo Kwibuka rwavuye kuri Diyoseze rusorezwa  ku Rwibutso rwa Kabgayi.

Mu ijambo rye, Guverineri w’Intara y’Amajyepfo Madamu KAYITESI Alice yatangiye yihanganisha abarokotse Jenoside yakorewe Abatutsi mu 1994,by’umwihariko abafite Abihayimana  n’abakoraga mu bigo by’Abihayimana  muri Diyoseze ya Kabgayi bo mu miryango yabo, bishwe muri Jenoside yakorewe Abatutsi mu 1994 baruhukiye mu Rwibutso rwa Kabgayi.

Guverineri yagize ati:” Uyu munsi duteraniye hano twibuka, turaha icyubahiro Abapadiri, Abafaratiri, Ababikira n’abandi Bihayimana n’abari muri uwo muhamagaro n’abakozi bakoraga mu bigo by’Abihayimana muri Diyoseze ya Kabgayi  bishwe muri Jenoside yakorewe Abatutsi mu 1994 bazira ko ari Abatutsi.”

Yagaye Abihaye Imana babuze umutima, bakiyambura ubumuntu, bakirengagiza ijambo ry’Imana bize kandi bigishaga bakica bagenzi babo.

Guverineri yavuze ko kwibuka atari umuhango ahubwo ari uguha icyubahiro abacu bazize Jenoside yakorewe Abatutsi ndetse no gufata icyemezo cyo kurwanya ikibi cyose cyakongera kudusubiza mu mwijima.

Guverineri kandi yagize ati:” Kwibuka  ni ugufata umwanya tugatekereza ku byabaye n’amateka ya jenoside yakorewe Abatutsi, uruhare rw’ubuyobozi bubi bwamaze igihe kinini bubiba urwango n’ivangura mu Byanyarwanda ndetse bukanifashisha bamwe mu bize no mu Bihayimana mu kubiba ivangura, urwango n’ubugome, bikageza kuri Jenoside aho Abatutsi barenga miliyoni bishwe mu gihe kitarenze iminsi ijana gusa.”

Yashimiye  ingabo zari iza RPF-Inkotanyi zari ziyobowe na Nyakubahwa Perezida wa Repubulika Paul KAGAME zahagaritse Jenoside ndetse zikabohora Igihugu. Yashimye kandi uruhare rwa Leta y’ubumwe mu kubaka ubumwe n’ubudaheranwa bw’Abanyarwanda ndetse no gukomeza kubaka Igihugu giteye imbere mu mibereho n’ubukungu, Abanyarwanda twese twibonamo ntawuhejwe.

Yavuze ko Abanyarwanda bafite amahirwe yo kugira ubuyobozi bwiza kandi bufite icyerekezo, budushyigikira mu rugendo rwo gusana imitima y’Abanyarwanda ndetse bukatwigisha gushyira hamwe.

Guverineri, yasoje asaba buri wese kurwanya ingengabitekerezo ya jenoside no kwamagana abavuga amagambo y’urwango, abapfobya ndetse n’abahakana Jenoside yakorewe Abatutsi.