Amarushanwa y'Umurenge Kagame Cup mu Karere ka Muhanga yasojwe ku mugaragaro tariki ya 28 Gashyantare 2025 aho Umurenge wa Nyamabuye wegukanye igikombe mu cyiciro cy’abagore mu gihe Ikipe y’umupira w’amaguru y’Umurenge wa Nyabinoni yegukanye igikombe mu bagabo.

Iyi mikino yitabiriwe n’Abagize Komite Nyobozi y’Akarere, inzego z’umutekano n’abaturage.

Umuyobozi w’Akarere  Madamu  KAYITARE Jacqueline ni we washyikirije ibihembo amakipe yabaye aya mbere n’aya kabiri. Amakipe yabaye aya mbere yashyikirijwe igikombe, sheki , umupira wo gukina ndetse n’imidari y’ishimwe, mu gihe amakipe yabaye aya kabiri yahawe sheki, imidari ndetse n’imipira yo gukina.

Aya marushanwa ya Kagame Cup agamije kwimakaza imiyoborere myiza binyuze mu mikino, hubakwa ubumwe n’ubusabane hagati y’abaturage. Yabaye umwanya mwiza wo kugaragaza impano mu mupira w’amaguru no gukangurira urubyiruko kugira uruhare mu iterambere ry’igihugu binyuze mu mikino. Insanganyamatsiko y’uyu mwaka ikaba yaravugaga ngo:”Twitabire imikino, twimakaza imiyoborere myiza n’umuco wo guhiga no kurushanwa.

Mu butumwa yahaye abitabiriye iyi mikino, Umuyobozi w’Akarere yabibukije ko intego y’aya marushanwa ari ukwimakaza amahame y’imiyoborere myiza no guteza imbere impano z’abato muri siporo.

By’umwihariko yasabye urubyiruko kwirinda ibiyobyabwenge, gukoresha neza ikoranabuhanga, kurushaho kubyaza umusaruro amahirwe bashyiriweho na Leta agamije kubateza imbere ndetse no gukomeza gusigasira ibyagezweho.

Yanaboneyeho kandi gushimira Imirenge yitwaye neza igatwara ibikombe ayisaba ko bitarangirira ku rwego rw’Akarere gusa ahubwo bakwiye kwitwara neza bakazatwara ibikombe no ku byiciro bikurikiyeho.