Kuri uyu wa 29 Nzeli 2021; Minisitiri w'ubuhinzi n'ubworozi Dr MUKESHIMANA Géraldine hamwe na Guverineri w'Intara y'Amajyepfo Madamu KAYITESI Alice bifatanyije n'abaturage bo mu Murenge wa Kibangu mu gutangiza ku mugaragaro igihembwe cy'ihinga cya 2022A.

Minisitiri w'ubuhinzi n'ubworozi Dr MUKESHIMANA Géraldine hamwe na Guverineri w'Intara y'Amajyepfo Madamu KAYITESI Alice n'abaturage bashyira ifumbire mu murima.

Iki gihembwe cy’ihinga cy’umuhindo, cyatangirijwe kuri Site ya Nkondo iherereye mu Kagari ka Gitega; haterwa Soya ku buso bwa Hegitari 10 kuri site ya Nkondo.

Ni igikorwa kandi cyari cyanitabirirwe n’umuyobozi w’Akarere, intumwa za RAB, abafatanyabikorwa batandukanye ndetse n’inzego z’umutekano ku rwego rw’Intara n’Akarere.

Mu butumwa butandukanye yahaye abaturage; Minisitiri yibanze ku kubashishikariza kujya bahingira ku gihe, bagakoresha ifumbire y'imborera nziza, imvaruganda n'imbuto y'indobanure, bityo bakarushaho kubyaza inyungu ubutaka bafite.

 Minisitiri w'ubuhinzi n'ubworozi Dr MUKESHIMANA Géraldine ageza ubutumwa ku bitabiriye

Yabasabye kandi gushyira imbaraga mu kuvugurura urutoki, bagahinga urutoki rutanga umusaruro mwiza kandi mwinshi ndetse anaboneraho kubasaba kwitabira gukora ubworozi bwa kijyambere butanga umusaruro mwinshi.

Yasoje abasaba kurushaho kurwanya isuri no gushyiraho uburyo bwo gufata amazi y'imvura hirindwa ingaruka zaterwa n'ibiza ndetse bakanakomeza kwirinda Covid19 mu mirimo yabo ya buri munsi.

Yanditswe na:

UWINGABIRE Dieudonné (Ag.PRO)