Ku itariki ya 08 Werurwe 2025 hirya   no hino mu mirenge habereye  ibirori byo kwizihiza umunsi mpuzamahanga w'umugore. Insanganyamatsiko y'uyu mwaka yagiraga iti:"Umugore ni uw'agaciro".

Ku rwego rw'Akarere ibirori byabereye mu Murenge wa Cyeza bikaba byitabiriwe na Hon. Depite Bitunguramye Diogene, Hon. Depite Umutesi Liliane na Hon. Depite Uwamahoro Prisca, Abagize inama Njyanama y'Akarere, Abafatanyabikorwa b'Akarere n'abandi.

Ibirori byabimburiwe no gutaha inzu yubakiwe Mutimawurugo Mukanyandwi Perpetue, guha abana amata n'indyo yuzuye  no kumurika ibikorwa by'iterambere byagezweho n'abagore bo mu Karere ka Muhanga  birimo ibikorwa by'ubuhinzi n'ubworozi, ubukorikori, ikoranabuhanga, ubucuruzi n'ibindi. Kuri uyu munsi kandi mu mirenge yose hatashywe amazu 12 yubakiwe ba Mutimawurugo batishoboye.

Mu ijambo ry’ikaze, Umuyobozi w’Akarere Madamu Kayitare Jacqueline yashimiye abagore bari mu rwego rw’Abikorera bafatanyije n’Inama y’igihugu y’Abagore kuva ku rwego rw’Akarere kugera ku Mudugudu bakubaka  amazu cumi n’abiri ya ba Mutimawurugo batishoboye.

Meya Kayitare yagize ati:” Turashima ko uyu munsi abagore cumi na babiri babonye icumbi ryiza rishimishije kandi abenshi muri bo ni abagore bayoboye imiryango, badafite abagabo babana muri izo nzu.”

Umuyobozi w’Akarere yavuze ko atari ibyo bikorwa byonyine bakoze ahubwo ko bakoze n’ibindi bikorwa bifite umusanzu bitanga ku muryango. Umuyobozi w’Akarere yavuze ko iyo wubatse ubushobozi bw’umugore uba wubatse ubushobozi bw’umuryango.

Yavuze kand iko mu rwego rwo gukomeza gusigasira ibyiza bimaze kugerwaho no guha agaciro ishema Igihugu cyahaye abagore, ba Mutimawurugo biyemeje kwita ku burere bw’abana, kurwanya ibyangiza b’abana b’abakobwa  kuko ari bo babyeyi b’ejo hazaza, kubaka umuco w’isuku mu muryango, kurwanya imirire mibi n’igwingira mu bana n’ibindi.

Umuyobozi w’Akarere yashimiye Intumwa za Rubanda zaje kwifatanya n’abatuye Akarere ka Muhanga mu birori byo kwizihiza Umunsi mpuzamahanga w’Umugore n’abafatanyabikorwa b’Akarere bagira uruhare mu gusigasira umuryango.

Mu butumwa  bwe, Depite Bitunguramye Diogene wari umushyitsi Mukuru muri ibi birori,  yashimye ibimaze kugerwaho mu guteza imbere umugore. Yavuze ko umunsi mpuzamahanga w’umugore udufasha gusubiza amaso inyuma tukishimira ibyagezweho mu iterambere ry’uburinganire n’ubwuzuzanye bw’abagabo n’abagore. Yavuze  ko nubwo hari ibyiza  bimaze kugerwaho hari  ahakigaragara ibibazo bigomba gushakirwa ibisubizo.Yasabye abitabiriye ibi birori kwirinda amakimbirane yo mu miryango, kugarura abana bata ishuri, gushyira imbaraga mu kurwanya ihohotera rishingiye ku gitsina rikorerwa abagore n’abakobwa n’ibindi bibazo bidindiza umuryango no kurwanya icuruzwa n’ikoreshwa ry’ibiyobyabwenge mu rubyiruko. Yasabye ababyeyi kwita ku burere bw’abana no kudahishira ababahohotera. Yashoje ashimira abagize inama y’Igihugu y’abagore ku rwego rw’Akarere besheje umuhigo wo kubaka amazu 12 ya ba Mutimawurugo.