Kuri uyu wa 24/02/2023, Umuyobozi w'Akarere ka Muhanga Madamu KAYITARE Jacqueline yitabiriye igikorwa cyo gusoza Urugerero rw'Inkomezabigwi icyiciro cya 10 rugize n'intore zarangije amashuri yisumbuye mu mwaka wa 2021-2022, cyabereye mu Murenge wa Nyamabuye.

Urugerero rw'Inkomezabigwi icyiciro cya 10 rwari rufite insanganyamatsiko igira iti:"Duhamye umuco w'ubutore twimakaza ubumwe n'ubudaheranwa"

 Umuyobozi w'Akarere Mme KAYITARE Jacqueline yashimiye Inkomezabigwi ibikorwa bitandukanye bakoze mu gihe cy'urugerero bisubiza ibibazo bibangamiye imibereho myiza y'abaturage, ndetse abaha n'impanuro zitandukanye zirimo kubibutsa ko urugerero ari ifumbire y'ubwenge  bityo ko utarugiyeho agwingira.

Bimwe mu bikorwa byakozwe n'izi ntore harimo gukemura ibibazo bibangamiye iterambere ry'umuturage birimo kubakira abatishoboye, guharura imihanda y'imigenderano, ubwiherero, ubukangurambaga kuri gahunda za leta (ejo Heza,Mituweli de Sante) banagize uruhare mu gukurikirana imikorere y'amarerero y'abana bato ndetse n'ibindi.

Mu gusoza uru rugerero hahembwe intore zitwaye neza ku giti cyazo mu gihe cy'urugerero ariko by'umwihariko hanahembwe Imirenge itatu yahize indi mu Karere mu bikorwa by'uru rugerero rw'Inkomezabigwi icyiciro cya 10 aho Umurenge wa Nyamabuye ariwo waje ku mwanya wa 1, ukurikirwa n'Umurenge wa Cyeza naho Umurenge wa Rugendabali uza ku mwanya wa Gatatu.

Uru rugerero rw'Inkomezabigwi icyiciro cya 10 rwari rumaze amezi asaga atatu Aho rwatangiye kuwa 14 Ukwakira 2022.

Yanditswe na NDATEBA Valens

PRMCO