Kuri uyu wa 02 Kamena 2023, ku Rwibutso rwa Jenoside yakorewe Abatutsi rwa Kabgayi, habereye igikorwa cyo kwibuka ku nshuro ya 29 Jenoside yakorewe Abatutsi mu 1994 no gushyingura mu cyubahiro imibiri 47 irimo 5 yimuwe na 42 yabonetse ahantu hatandukanye mu Karere ka Muhanga.

Iki gikorwa kitabiriwe na Guverineri w'Intara y'Amajyepfo, Abadepite, Perezidante wa Komisiyo y'Uburenganzira bwa muntu, Abayobozi b'Uturere twa Ruhango na Kamonyi, Abayobozi wungirije w’Akarere ka Ngororero ushinzwe imibereho myiza, Ubuyobozi bw'Akarere ka Muhanga, IBUKA, AVEGA, Inzego z'umutekano n'abandi bayobozi mu nzego zinyuranye.

Iki gikorwa kandi; cyabimburiwe no kujya gushyira indabo ku Rwibutso rwa Ngororero no mu mugezi wa Nyabarongo mu rwego rwo kwibuka no kunamira Abatutsi bakuwe i Kabgayi bakajya kuhicirwa mu gihe cya Jenoside yakorewe Abatutsi.

Umuyobozi w’Akarere ka Muhanga Madamu KAYITARE Jacqueline mu ijambo rye ry’ikaze yashimiye ubuyobozi bukuru bw’Igihugu cyacu, anashimira kandi abahagaritse Jenoside bakagarura umutekano n’ituze mu gihugu bakimakaza ubumwe n’ubwiyunge bw’Abanyarwanda ndetse akanasaba abantu bafite amakuru y’ahakiri imibiri y’Abatutsi bishwe muri Jenoside yakorewe Abatutsi mu 1994 kuyatanga kugira ngo nayo izashyingurwe mu cyubahiro. abaitabiriye iki gikorwa,ndetse.

Umuyobozi w’Akarere kandi asoza ijambo rye, yasabye ubuyobozi bw’Intara y’Amajyepfo ubufasha mu kwagura no kongerera ubushobozi urwibutso rwa Jenoside yakorewe Abatutsi rwa Kabgayi.

Guverineri w’Intara y’Amajyepfo Madamu KAYITESI Alice mu ijambo rye yihanganishije imiryango yarokotse Jenoside yakorewe Abatutsi mu 1994, by’umwihariko iyashinguye mu cyubahiro imibiri yabonetse ahantu hatandukanye ndetse aboneraho umwanya wo kugaya abari abayobozi bagize uruhare mu kwigisha amacakubiri n’ngengabitekerezo ya Jenoside.

Mu bindi byaranze iki gikorwa, harimo ubutumwa butandukanye bw’abayobozi ,ubuhamya ndetse n’ubutumwa bwo kwibuka no kurwanya ingengabitekerezo ya Jenoside bwatanzwe biciye mu ndiribo zitandukanye.

Iki gikorwa cyasojwe n’umuhango wo gushyingura mu cyubahiro imibiri 47 y’abazize Jenoside yakorewe Abatutsi mu 1994 ndetse no gushyira indabo kuri uru Rwibutso mu rwego rwo kunamira inzirakarengane ziruruhukiyemo. 

Yanditswe na:

NDATEBA VALENS

PRMCO