Kuri uyu wa 12 Gicurasi 2023, ku cyicaro cy’ Itorero rya ADEPR Ururembo rwa NYABISINDU, habereye igikorwa cyo kwibuka ku nshuro ya 29 Jenoside yakorewe Abatutsi mu 1994. Iki gikorwa cyabimburiwe no gushyira indabo ku Rwibutso rwa Nyabisindu ruruhukiyemo imibiri isaga 120 y'abazize Jenoside yakorewe Abatutsi biciwe kuri ADEPR-NYABISINDU. Iyi ni italiki y’amateka ku baharokokeye kuko ari bwo hiciwe Abatutsi bari bahahungiye baturutse mu bice bitandukanye ubu bigize Intara y’Amajyepfo n’iy’Uburengerazuba.

Iki gikorwa cyitabiriwe na Hon. UWANYIRIGIRA Marie Florence ari na we wari umushyitsi mukuru, Umuvugizi wa ADEPR ku rwego rw’igihugu Pasiteri NDAYIZEYE Isaie, Perezida w'Inama Njyanama y'Akarere Bwana NSHIMIYIMANA Octave, Umuyobozi w'Akarere ka Muhanga Madamu KAYITARE Jacqueline, Umuyobozi w’Akarere wungirije ushinzwe Imibereho myiza mu Karere ka Ngororero Madamu MUKUNDUHIRWE Benjamine, Perezida wa IBUKA mu Karere ka Muhanga, Inzego z’umutekano, ndetse n'abandi bayobozi mu nzego zitandukanye.

Mu ijambo ry'ikaze Umuyobozi w’Akarere ka Muhanga Madamu KAYITARE Jacqueline yagejeje ku bitabiriye iki gikorwa, yibanze ku kwihanganisha abarokotse Jenoside yakorewe Abatutsi mu 1994, asobanura uko abiciwe kuri ADEPR-NYABISINDU bari biganjemo ab’i Muhanga n’abo mu Ngororero mu cyahoze ari Komini Kibilira bari barahahungiye.

Mu butumwa butandukanye bwatanzwe n’abandi bayobozi bari bitabiriye iki gikorwa harimo n’abo mu Itorero rya ADEPR ndetse n’abahagarariye IBUKA, bibanze ku kwihanganisha ababuriye ababo kuri ADEPR NYABISINDU muri Jenoside yakorewe Abatutsi mu 1994, bakanagaya Abashumba babaye ibigwari ntibabashe kurinda ababahungiyeho ahubwo bakagira uruhare mu kubica ndetse bakanashima abayihagaritse hamwe na Leta y'Ubumwe ikomeje kongerera icyizere cyo kubaho abarokotse Jenoside.

Asoza iki gikorwa, Hon. UWANYIRIGIRA Marie Florence, yasabye abitabiriye iki gikorwa gukomeza gufatanya mu rwego rwo guhangana n’ingengabitekerezo ya Jenoside, abagenda bayikwirakwiza n’abayipfobya ndetse anabibutsa ko kwibuka ari inshingano ya buri Munyarwanda wese.

Yashimye kandi Leta y’Ubumwe bw’Abanyarwanda yashyize imbere politiki nziza zo gufasha no guhangana n’ingaruka za Jenoside, gufasha abatishoboye barokotse Jenoside yakorerwe Abatutsi mu 1994, ndetse n’itegeko rihana icyaha cya Jenoside, ihakana n’ipfobya bya Jenoside. Yanashimiye kandi Ubuyobozi bw’Akarere ka Muhanga uburyo buha agaciro ibikorwa byo kwibuka.

Yasoje ijambo rye ashimira ingabo zahoze ari iza RPA zari ziyobowe na Nyakubahwa Perezida wa Repubulika y’U Rwanda Paul KAGAME, zitangiye u Rwanda, zikarubohora, zikarukura mu maboko y’abicanyi, zigahagarika Jenoside, zikunamura icumu mu Rwanda.

Ku bufatanye bw’Akarere ka Muhaga na ADEPR-Nyabisindu, kandi hanatashywe inzu yasaniwe uwarokotse Jenoside mu 1994 utishoboye wo mu Murenge wa Nyamabuye, Akagari ka Remera, mu Mudugudu wa Gasharu ndetse agurirwa n’ibikoresho byo mu nzu.

Yanditswe na

NDATEBA Valens

PRMCO