Ku itariki ya 09 Nzeri,  uu cyumba cy’inama cy’Akarere habereye inama nyunguranabitekerezo yateguwe ku bufatanye bwa Minisiteri y’Ubutegetsi bw’Igihugu n’Intara y’Amajyepfo yitabiriwe na ba Visi Meya bashinzwe imibereho myiza mu Turere tugize Intara y’Amajyepfo, Abayobozi b’Amashami afite mu nshingano ibikorwaremezo n’imibereho myiza mu turere n’abandi.

Yateguwe hamijwe gusobanura amabwiriza ya Minisitiri Minisiti w’Ubutegetsi bw’Igihugu agena uburyo Leta n’Abafatanyabikorwa bayo bakurikiza mu guhitamo, gutuza, gucunga no kwegurira inzu umuturage ndetse no kugena inshingano z’utuzwa n’uruhare rwa buri rwego bireba mu micungire y’inzu zihabwa abaturage zubatswe na Leta.

Ni amabwiria ya Minisitiri w’Ubutegetsi bw’Igihugu yasohotse ku wa 30 Kamena 2025 yerekeye gutuza abantu asimbura ayo mu 2017 yateganyaga ko uburyo bwo gutuza abaturage ku ruhande rwa Leta ari ukububakira inzu zikaba izabo.

Aya mashya yo ateganya uburyo butatu harimo guha umuturage inzu ikaba iye burundu, kuyitizwa mu gihe runaka yazagira ubushobozi akayivamo hamwe no kujya ayikodesha na Leta ku mafaranga ajyanye n’ubushobozi bwe.

Leta n’abafatanyabikorwa bayo bazajya bahitamo gutuza abaturage bafite ibyago byinshi byo kugira imibereho mibi, kandi bazashyiraho uburyo buhoraho bwo gukurikirana imikoreshereze y’izo nzu kugira ngo zirinde kwangirika cyangwa gukoreshwa nabi.

Gutuzwa ntabwo bigomba gutandukana n’inshingano. Uwatujwe azasabwa kubungabunga inzu, kutayigurisha mu buryo butemewe, kuyibyaza umusaruro wemewe ndetse no kwitwara neza mu mibanire ye n’abaturanyi.

Ibi byose bizanafasha kubaka ubufatanye hagati ya Leta n’abaturage, mu guteza imbere imibereho myiza y’Abanyarwanda.