Ku itariki ya 15 Ukwakira 2025, mu Mirenge yose igize Akarere, hizihijwe Umunsi Mpuzamahanga w'Umugore wo mu cyaro ufite insanganyamatsiko igira iti: "Umugore ni uw'agaciro"

Ku rwego rw'Akarere, uyu munsi wizihirijwe mu Kagari ka  Ngaru mu Murenge wa Nyarusange aho abaturage bifatanyije n’abagize Komite Nyobozi y'Akarere, Intumwa z'inama y'Igihugu y'abagore ku rwego rw'Intara y'Amajyepfo, Abajyanama mu Nama Njyanama y'Akarere, Abafatanyabikorwa b'Akarere, Abahagarariye imiryango ishingiye ku myemerere, inzego z'umutekano, abahagarariye ibyiciro byihariye n'abandi.

Ni ibirori byabimburiwe n'imurikabikorwa ry'ibikorwa bya ba Mutimawurugo mu buhinzi n'ubworozi, ubukorikori ndetse no guha abana amata n'indyo yuzuye.

Mu butumwa bwe, Umuyobozi w’Akarere Madamu KAYITARE Jacqueline yavuze ko abagore bo mu cyaro bafite uruhare rukomeye mu iterambere ry’umuryango n’iterambere ry’Igihugu muri rusange.

Yagize ati:” "Turi abagore bo mu cyaro, turi abagore b’agaciro, turi abagore bafite uruhare mu iterambere ry’imiryango yacu n’iterambere ry’Igihugu muri rusange.Ntituzapfusha ubusa agaciro twasubijwe na Nyakubahwa Perezida wa Repubulika, kandi turamwizeza ko ako gaciro tugakomeyeho kuko turashyigikiwe". Ibirori byasojwe no gutanga ibihembo ku muryango w’intangarugero mu mibanire myiza no gufasha abandi kuva mu makimbirane, kuremera ba Mutimawurugo bo miryango itishoboye, Ibihembo kuri bamutimawurugo bagize uruhare mu kwikura mu bukene no guteza imbere abandi,  gutanga ibikoresho ku marerero yo mu ngo no kuri ba Mutimawurugo bakoze ibikorwa by’indashyikirwa mu gukoresha neza inguzanyo .

Muri ibi birori kandi imiryango itanu yorojwe inka muri gahunda ya Girinka, harimo umuryango worojwe n’Abakozi b’Urwego rwunganira Akarere mu gucunga umutekano (DASSO)