Ku itariki ya 01 Gashyantare 2025, mu Midugudu yose igize Akarere abayobozi n'abaturage bitabiriye ibirori byo kwizihiza umunsi w'intwari z’Igihugu. Ku rwego rw'Akarere, Umunsi w'intwari wizihirijwe mu Kagari ka Buramba mu Murenge wa Kabacuzi.

Ni Ibirori byitabiriwe n'Abayobozi batandukanye barimo Intumwa za rubanda, Abajyanama mu nama Njyanama y'Akarere, Abagize inama y'Umutekano itaguye y'Akarere, Abafatanyabikorwa b'Akarere, abahagarariye imiryango ishingiye ku myemerere n'abandi.

Ibirori by'uyu munsi byabimburiwe n'imurikabikorwa ry'ibikorwa  by'iterambere bishingiye ku buhinzi n'ubworozi, ubukorikori n'ibindi.

Insanganyamatsiko y'uyu mwaka yagira iti:“Ubutwari n’ubumwe bw’Abanyarwanda, inkingi y’iterambere”

Kuri uyu munsi kandi hakozwe ibikorwa bitandukanye birimo guha abana indyo yuzuye, imiryango yorojwe inka muri gahunda ya girinka, imwe mu miryango itishoboye yararemewe, abitabiriye ibirori bahawe ikiganiro cyagarutse ku butwari n’ubumwe bw’Abanyarwanda ndetse abitabiriye ibi birori bapimwe ku bushake indwara zitandura bahabwa n’ubujyanama.

Mu ijambo yagejeje ku bitabiriye ibi birori Honorable Depite NIZEYIMANA Pie yavuze ko ku itariki ya 01 Gashyantare buri mwaka mu Rwanda twizihiza Umunsi w’intwari z’Igihugu, yavuze ko ari umunsi Abanyarwanda twibuka, tugasingiza ndetse tukanazirikana ibikorwa bihebuje byaranze Intwari z’Igihugu. Yavuze ko ari ngombwa kwizihiza uumunsi w’Intwari z’Igihugu no kurata ibikorwa byazo kugira ngo bibere urugero rwiza Abanyarwanda twesese cyane cyane urubyiruko.

Yasabye urubyiruko kugera ikirenge mu cy’Intwari zabohoye u Rwanda no gusigasira ibyagezweho.

Depite NIZEYIMANA Pie kandi yagize ati:” Mu kwizihiza uyu munsi kandi, Abanyarwanda n’urubyiruko by’umwihariko bongera kuzirikana ko umuco w’ubutwari ari inking ya mwamba yubatse Igihugu cyacu kuva kera, ibyo Abanyarwanda bakaba barabitojwe kuva u Rwanda rwabaho kugeza uyu munsi, abato batozwa gukora icyagirira akamaro Igihugu kandi bakirinda ubugwari no kugamburuzwa n’amananiza ayo ari yo yose.”

Yasoje ubutumwa bwe ashima ubutwari bw’Ingabo zari iza RPA Inkotanyi zabohoye u Rwanda ndetse zigahagarika Jenoside yakorewe Abatutsi mu 1994.