Kuri uyu wa gatanu, tariki ya 05 Kanama 2022, mu Midugudu yose igize Akarere ka Muhanga, abayobozi mu nzego zitandukanye bifatanyije n'abaturage mu birori byo kwizihiza Umunsi Mukuru w'Umuganura wari ufite insanganyamatsiko igira iti: "Isôoko y'ubumwe n'ishingiro ryo kwigira". Hose, ibi birori byaranzwe n'ibikorwa bitandukanye birimo kumurika ibyagezweho mu buhinzi n'ubworozi, guha abana amata no kubagaburira, kuganuza no kuremera imiryango itishoboye, indirimbo n'imbyino, ubusabane ndetse n'ibindi.

 Perezida w'Inama Njyanama y'Akarere Bwana NSHIMIYIMANA Octave hamwe na V/Mayor ushinzwe Iterambere ry’ubukungu Bwana BIZIMANA Eric bifatanyije n'abaturage bo mu Mudugudu wa Nkondo

Muri ibi birori; Perezida w'Inama Njyanama y'Akarere Bwana NSHIMIYIMANA Octave hamwe n’Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric bifatanyije n'abaturage bo mu Mudugudu wa Nkondo, Akagari ka Gitega mu Murenge wa Kibangu naho Umuyobozi w'Akarere KAYITARE Jacqueline n’umuyobozi w’Akarere wungirije ushinzwe Imibereho myiza Bwana MUGABO Gilbert bifatanya n'abo mu Mudugudu wa Rugogwe, Akagari ka Nyamirambo mu Murenge wa Rongi ndetse anasezeranya imbere y'amategeko imiryango 33 harimo 29 yabanaga mu buryo butemewe n'amategeko.

 Umuyobozi w'Akarere KAYITARE Jacqueline na V/Mayor ushinzwe Imibereho myiza Bwana MUGABO Gilbert bifatanya n'abo mu Mudugudu wa Rugogwe

Mu butumwa butandukanye yagejeje ku bitabiriye ibi birori mu Mudugudu wa Nkondo, Perezida w’Inama Njyanama y’Akarere yibanze ku gushima uko ibi birori byateguwe, abibutsa ko Umuganura ari umwanya mwiza wo gusabana kw’abayobozi n’abayoborwa mu nzego zose z’ubuzima bw’Igihugu, bikagaragaza ubufatanye n’ubumwe bw’abagize umuryango Nyarwanda.

 Perezida w'Inama Njyanama y'Akarere Bwana NSHIMIYIMANA Octave ageza ijambo ku bitabiriye

Yanabibukije ko kwizihiza Umuganura 2022 bishingiye ku ndangagaciro z’umuco w’u Rwanda ari zo gukunda Igihugu, kurangwa n’ubupfura, gukunda umurimo n’ubumwe ndetse asoza abasaba gusubira ku isoko y’umuco wacu, bakavomamo ibishobora kubafasha gukemura ibibazo bahura na byo mu buzima bwa buri munsi uko Igihugu kigenda gitera imbere, bakanishimira ibyo gahunda za Leta zatumye bageraho, haba mu mibereho myiza, mu bukungu, mu burezi, mu miyoborere, mu butabera ndetse no mu birebana n’umutekano. Ibi birori byasojwe n’ubusabane.

Abayobozi bahaye amata abana

Yanditswe na:

UWINGABIRE Dieudonné (Ag.PRO)