Kuri uyu wa 08 Werurwe 2022, mu Mirenge yose igize Akarere ka Muhanga, hijihijwe Umunsi Mpuzamahanga w’Umugore wari ufite insanganyamatsiko igira iti: “Uburinganire n’ubwuzuzanye mu mihindagurikire y’ibihe”.

Uyu munsi mukuru, ku rwego rw’Akarere wijihirijwe mu Murenge wa Nyabinoni, Akagari ka Gashorera mu Mudugudu wa Muzamuzi, aho abaturage bifatanyije n’intumwa ya rubanda yaturutse mu Ihuriro ry'abanyarwandakazi bari mu nteko ishinga amategeko (FFRP) Hon. UWUMUREMYI Marie Claire ari nawe wari umushyitsi mukuru. I Nyabinoni kandi, uyu munsi mukuru wari wanitabiriwe n’Umuyobozi w’Akarere Madamu KAYITARE Jacqueline, intumwa y’Inama y’Igihugu y’Abagore ku rwego rw’Igihugu, Umuhuzabikorwa w’Inama y’Igihugu y’Abagore ku rwego rw’Akarere, inzego z’umutekano n’abafatanyabikorwa batandukanye.

Hon. UWUMUREMYI Claire n’abandi bayobozi bari bitabiriye I Nyabinoni

No mu yindi Mirenge kandi, bifatanyije n’intumwa za rubanda zaturutse mu Ihuriro ry'abanyarwandakazi bari mu nteko ishinga amategeko (FFRP), aho Hon. KALINIJABO Barthelemy yifatanyije n’abaturage bo mu Murenge wa Rugendabali naho Hon. NDAGIJIMANA Léonard akifatanya n’abo mu Murenge wa Muhanga. Abagize Komite Nyobozi y’Akarere hamwe n’abafatanyabikorwa b’Akarere nabo bifatanyije n’abaturage mu kwizihiza uyu munsi mukuru mu Mirenge itandukanye.

 Hon. B.KALINIJABO n’Umunyamabanga Nshingwabikorwa w’Akarere bifatanyije n’abaturage bo mu Murenge wa Rugendabali

Mu Mirenge yose, uyu munsi mukuru waranzwe n’imurikabikorwa ry’ibyagezweho naba Mutimawurugo, gutanga ubutumwa butandukanye bujyanye n’insanganyamatsiko n’izindi gahunda za Leta binyuze mu mbwirwaruhame, ikinamico, indirimbo n’imbyino, kuremera ba Mutimawurugo batishoboye no guha abana indyo yuzuye.

Abayobozi bitabiriye ibirori I Nyabinoni batanga indyo yuzuye ku bana

Mu rwego rwo kwizihiza uyu munsi mukuru kandi, mu Mirenge yose Akarere kahaye Telefoni zigezweho (Smartphones) Abahuzabikorwa b’Inama y’Igihugu y’Abagore ku rwego rw’Utugari twose uko ari 63 tugize Akarere, kugira ngo zizaborohereze gushyira mu bikorwa neza inshingano zabo.

 Akarere kahaye Abahuzabikorwa ba CNF ku rwego rw’Utugari twose Telefoni zigezweho (Smartphones)

Mu butumwa butandukanye Umuyobozi w’Akarere yagejeje ku baturage bitabiriye uyu munsi mukuru aho wari wijihirijwe ku rwego rw’Akarere, yibanze cyane ku gusaba buri wese kugira ubufatanye mu guhangana n'imihindagurikire y'ibihe, barushaho kubungabunga ibidukikije, ndetse anaboneraho kubasaba kurushaho kwitabira gahunda zitandukanye Leta yabashyiriyeho zigamije iterambere rirambye cyane ko hari n’izo ibashyiriramo nkunganire, kwitabira umurimo, guharanira kubana neza no guha abana babo uburere bwiza hagamijwe kugira umuryango utekanye.

Umuyobozi w’Akarere Mme KAYITARE Jacqueline ageza ubutumwa ku bitabiriye

Mu ijambo rye, Hon. UWUMUREMYI Marie Claire wari n’umushyitsi mukuru muri ibi birori, yibukije abitabiriye uruhare abagore bafite mu iterambere ry'Igihugu n'isi muri rusange, abibutsa ko uyu munsi wizihizwa mu rwego rwo kwishimira ibyagezweho n'umugore yaba mu mibereho myiza, ubukungu, umuco ndetse no muri politike ariko kandi bakanibukiranya gukomeza gukora ibikorwa biteza imbere umugore mu rwego rwo kumwongerera ubushobozi.

 Hon. UWUMUREMYI Marie Claire wari n’umushyitsi mukuru ageza ubutumwa ku bitabiriye

Yakomeje abasaba kurushaho kwimakaza uburinganire n'ubwuzuzanye hagati y'abagore n'abagabo mu guhangana n'ingaruka z'imihindagurikire y'ibihe, bakazamura uruhare bagira mu kubungabunga ibidukikije, bityo bikazihutisha kubona ingaruka nziza nk’uko byibanzweho mu ntego z'iterambere rirambye. Yasoje ashimira Ubuyobozi bukuru bw'Igihugu imbaraga bukomeje gushyira mu guharanira icyateza imbere abaturage n'umugore by'umwihariko.

Yanditswe na:

UWINGABIRE Dieudonné (Ag.PRO)