Kuri uyu wa 29 Kamena 2022, Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric yatangije ku mugaragaro imirimo yo kubaka imihanda mishya ya kaburimbo ireshya na 6,9Km na Ruhurura zireshya na 2,6Km mu Mujyi wa Muhanga, muri gahunda ya RUDPII/Phase3 yo guteza imbere ibikorwaremezo mu Mijyi 6 yunganira Kigali.

Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric atangiza iyubakwa ry’iyi mihanda

Muri iyi mihanda igiye kubakwa, umwe ni umuhanda ushamikiye ku muhanda munini Kigali-Huye, umanuka ku Kigo cy’ishuri cya Gahogo Adventist Academy, ukagarukira kuri Sitasiyo ya GEMECA ndetse n'undi muhanda ushamikiyeho, uzamuka ahazwi nko kuri Sinyora ugakomeza kugera kuri ADEPR Gahogo. Umuhanda wa kabiri, uzaturuka ku musaraba (Zenith) ukomeze kuri Zipline kugera I Karama ndetse unyure inyuma y'Ibiro by'Umurenge wa Shyogwe kugeza ahazwi nko kuri Tourisme. Ruhurura zizubakwa muri iyi gahunda zo, zizubakwa I Nyabisindu, Nyarucyamu ndetse n’I Gahogo.

Imihanda izubakwa

Mu ijambo rye, Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric yasabye ko iyi mirimo ikorwa neza kandi ikihutishwa kugira ngo izarangirire ku gihe cyagenwe. Yasoje amenyesha abari bitabiriye iki gikorwa ko, ibi bikorwaremezo byose bizubakwa, bizatwara ingengo y'imari y’amafaranga asaga Miliyari 6,5 Frw, ndetse bikaba biteganyijwe ko bizatanga imirimo ku baturage basaga 2,000.  Umuyobozi w’Akarere wungirije ushinzwe Iterambere ry’ubukungu Bwana BIZIMANA Eric ageza ijambo ku bitabiriye igikorwa

Yanditswe na:

UWINGABIRE Dieudonné (Ag.PRO)