Kuri uyu wa kabiri tariki ya 09 Kanama 2022, mu Tugari twose hatangijwe gahunda y'Intore mu biruhuko 2022 ifite ku nsanganyamatsiko igira iti: "Ibiruhuko bifite intego, agaciro kanjye". Iyi gahunda ikaba igamije gutoza abana n’urubyiruko bari mu biruhuko by’amashuri, kurinda ubuzima bwabo ndetse no gukunda Igihugu baharanira kwigira no kugira uruhare mu iterambere ryacyo.

Ku rwego rw'Akarere, iyi gahunda yatangirijwe ku Kigo cy'urubyiruko cya Muhanga, aho Umushyitsi Mukuru yari Umunyamabanga Nshingwabikorwa w'Inama y'Igihugu y'Urubyiruko Bwana MWESIGWA Robert.

Abayobozi mu nzego zitandukanye bitabiriye itangizwa rya gahunda y’Intore mu biruhuko

Ibirori byo gutangiza iyi gahunda byaranzwe n’umukino wa Basketball wahuje amakipe y’urubyiruko rusanzwe rwitoreza ku Kigo cy’urubyiruko, imbyino za Kinyarwanda n’iza kizungu, ikinamico ndetse n’ibindi.

 Umunyamabanga Nshingwabikorwa w'Inama y'Igihugu y'Urubyiruko Bwana MWESIGWA Robert ageza ubutumwa ku bitabiriye iki gikorwa

Mu ijambo rye, Umunyamabanga Nshingwabikorwa w'Inama y'Igihugu y'Urubyiruko Bwana MWESIGWA Robert, yashimiye urubyiruko rwitabiriye iyi gahunda ndetse abasaba gushishikariza abataje kujya bayitabira ku Kagari kabegereye kuko igamije kubafasha kubyaza umusaruro ibihe by’ibiruhuko bagaragaza umusanzu wabo mu iterambere ry’umuryango n’Igihugu muri rusange, kutishora mu ngeso mbi zibangiriza ubuzima, kubatoza indagagaciro Nyarwanda n’ubumenyi butandukanye ndetse no guteza imbere impano bifitemo haba mu mikino, ubuhanzi, ubugeni n’ibindi.

Iyi gahunda y’Intore mu biruhuko yatangijwe uyu munsi izasozwa kuwa 08 Nzeli 2022. Izajya iba kuwa kabiri no kuwa kane, ibere ku rwego rwa buri Kagari kandi yitabirwe n’abana n’urubyiruko bafite imyaka kuva kuri 6 kugeza kuri 30.

Abana bato babarizwa mu cyiciro cy’imbuto basusurukije abitabiriye iki gikorwa

Yanditswe na:

UWINGABIRE Dieudonné (Ag.PRO)