Kuri uyu wa 14 Werurwe 2022, itsinda ry'Abadepite rigizwe na Hon. MUHAKWA Valens, Hon. MUKAYIJORE Suzanne na Hon. MUREBWAYIRE Christine ryatangiye uruzinduko ruzamara iminsi 14 mu Karere ka Muhanga, aho biteganyijwe ko muri uru ruzinduko bazagera mu Mirenge yose.

 Hon. MUHAKWA Valens (Hagati) ukuriye itsinda hamwe n’Umuyobozi w’Akarere n’uhagarariye ingabo

Uru ruzinduko rwabimburiwe n'inama bakoranye n'ubuyobozi n'abakozi b'Akarere, Abanyamabanga Nshingwabikorwa b'Imirenge, inzego z'umutekano n'abahagarariye Ibigo bya Leta bifite amashami mu Karere ka Muhanga.

 Hon. MUKAYIJORE Suzanne na Hon. MUREBWAYIRE Christine bagize itsinda ry’Abadepite bari mu ruzinduko mu Karere

Iyi nama yibanze ku kugaragariza Abadepite ishusho rusange y'Akarere, imibereho y'abaturage b'Akarere ka Muhanga, ishyirwamubikorwa ry'imishinga y'iterambere ndetse n'ishusho y'uko ibibazo bagejejweho n'abaturage mu ruzinduko ruheruka byakemuwe. Hon. MUHAKWA Valens ukuriye iri tsinda, yasobanuriye abitabiriye iyi nama ko muri uru ruzinduko, Abadepite bazasura Imirenge yose, bakagenzura uko ibibazo bagejejweho mu ruzinduko ruheruka byakemutse, bagasura ibikorwaremezo bigamije kugeza mu baturage amazi meza, ibikorwa byo kubaka ibyumba by'amashuri no gusana ibishaje, imihanda, ndetse bakazanasura zimwe mu Nzibutso za Jenoside yakorewe Abatutsi.

Abahagarariye inzego zitandukanye bari bitabiriye inama n’Abadepite

Yongeyeho ko bazasura kandi imishinga y'iterambere n'ibikorwa bifitiye abaturage akamaro biteganyijwe mu ngengo y'imari ya 2021-2022, mu rwego rwo gukurikirana ishyirwamubikorwa ryabyo hagamijwe gukumira ibibazo bishobora kuvuka mu ishyirwamubikorwa ry'iyo mishinga n'ibikorwa kugira ngo batange inama ku byakosorwa hakiri kare.

Yasoje asobanura ko mu Mirenge yose, Abadepite bazanaboneraho umwanya wo kuganira n'abaturage bahagarariye abandi hagamijwe kungurana ibitekerezo ku ngingo zinyuranye zigamije guteza imbere ubukungu n'imibereho myiza y'abaturage ndetse bakazanaganiriza imwe mu miryango irimo amakimbirane.

Yanditswe na:

UWINGABIRE Dieudonné (Ag.PRO)