Kuri uyu gatanu tariki ya 26 Ugushyingo 2021, mu Mirenge yose igize akarere ka Muhanga, abaturage 331 baherutse guhabwa telefoni zigezweho (Smartphone) muri gahunda ya #ConnectRwanda bahawe amahugurwa ku mikorere yazo.

Umukozi w’Umurenge wa Shyogwe ahugura abaturage bahawe Telefoni

Aya mahugurwa yateguwe n’ubuyobozi bw’Akarere hagamijwe kongerera abahawe telefoni zigezweho ubumenyi bwo kuzikoresha, imikorere yazo, ibyo zishobora kubafasha ndetse no kubigisha uko bakwisabira serivisi mu nzego z'ibanze biciye ku rubuga rw'irembo muri gahunda ya #Byikorere

Abahawe Telefoni bahugurwa

Bamwe mu bahuguwe bagaragaje ko bishimiye icyo gikorwa biyemeza ko bagiye kugaragaza itandukaniro mu mikorere yabo ya buri munsi, ndetse banishimira ko bagiye kujya bisabira serivisi zitandukanye bakoresheje ikoranabuhanga, kandi byajyaga bibahenda kuko byabasabaga kwishyura ababibafashamo.

Abahuguwe ni abaturage 331 baherutse gushyikirizwa telefoni zigezweho (Smartphone) na Minisitiri w’Ikoranabuhanga na Inovasiyo kuwa 22 Ugushyingo 2021 muri gahunda ya #ConnectRwanda.

Ubukangurambaga bwa #ConnectRwanda bwatangijwe na Minisiteri y’Ikoranabuhanga na Inovasiyo mu Ukuboza 2019 hagamijwe kugenera abaturarwanda telefoni ngendanwa zigezweho mu rwego rwo kwihutisha iterambere ry’ubukungu bushingiye ku ikoranabuhanga.

Yanditswe na:

UWINGABIRE Dieudonné (Ag.PRO)